Champions League pritet të rifillojë në muajin gusht, por ka ende shumë paqartësi rreth vijimit të këtij sezoni. Katër skuadra janë kualifikuar në çerekfinale dhe pritet të mësohen katër skuadrat e tjera. Ndeshjet e mbetura mund të luhen në një vend, teksa Stambolli dhe Lisbona janë alternativat.
Për këtë argument ka folur edhe presidenti i Federatës Shqiptare të Futbollit, Armand Duka, i cili për “Radio Punto Nuovo” është shprehur: “Jam shumë i kënaqur që futbolli italian rikthehet sot me një ndeshje shumë interesante: Juventus-Milan. Shpresoj që të përfundojë kampionati, rregullat në Itali janë pak të rrepta, por shpresojmë që ky sezon të përfundojë.
Final 8 në Lisbonë? E kam lexuar lajmin në gazeta, por nuk është marrë asnjë vendim deri tani. Grupet e punës po merren me këtë gjë dhe vendimi zyrtar do të merret më datë 17 qershor. Nuk e di nëse do të luhet Champions League në Lisbonë, ka diskutime të ndryshme për këtë temë. Një prej tyre është e ardhmja e këtij kompeticioni: po mendojmë të luhet një ndeshje teke, jo më dy për t’u kualifikuar më tej. Ende nuk ka asgjë zyrtare. Gushti do të jetë muaji i Champions League, gjithashtu ai i eliminatoreve për sezonin e ardhshëm. Ndoshta mund të luhen ndeshje teke, kështu mund të ndodhë edhe në Europa League.
Riformatimi i Champions League? Parashikohet një ndryshim për kualifikueset e radhës. Mund të zhvillohet një ndeshje teke nga faza çerekfinale e më tej. Do të diskutohet gjithçka më 17 qershor, veçanërisht se si do të përfundojnë kompeticionet e këtij viti“, përfundon Duka
Duka është pjesëtar i Komitetit Ekzekutiv të UEFA-s dhe sigurisht që ka informacion të saktë në lidhje me planet e institucionit që drejton futbollin europian. Champions League nuk ka mbyllur ende fazën e 1/8-ve, por UEFA ka vendosur që në situatën e pandemisë përparësi të kenë kampionatet kombëtare dhe pastaj kompeticionet ndërkombëtare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
