.png)
Gazeta Si – Supertajfuni “Fung-wong”, stuhia më e fortë e vitit në Filipine, ka filluar të godasë bregdetin verilindor të arkipelagut.
Autoritetet kanë urdhëruar evakuimin paraprak të gati një milion njerëzve në pritje të përkeqësimit të kushteve të motit.
Sipas të dhënave nga Shërbimi Kombëtar Meteorologjik, Fung-wong po lëviz me erëra të qëndrueshme deri në 230 kilometra në orë dhe po mbulon një front prej afërsisht 1,600 kilometrash, mjaftueshëm për të prekur dy të tretat e të gjithë arkipelagut.
Ekspertët paralajmërojnë se reshjet mund të shkaktojnë përmbytje të përhapura dhe rrëshqitje toke, veçanërisht në zonat malore qendrore dhe veriore.
Ndërprerje të gjera të energjisë elektrike, përmbytje dhe stuhi të forta janë raportuar në disa provinca bregdetare në orët e fundit, ndërsa qeveria ka urdhëruar mbylljen e shkollave dhe zyrave në pjesën më të madhe të ishullit Luzon, përfshirë kryeqytetin Manila, ku deri më tani janë anuluar gati 300 fluturime.
Presidenti Ferdinand Marcos Jr. ka shpallur gjendje të jashtëzakonshme kombëtare për shkak të katastrofës së dyfishtë që ka goditur vendin: dëmet e vazhdueshme nga tajfuni “Kalmaegi”, i cili ditët e fundit ka marrë mbi dyqind jetë, dhe kërcënimin e ri që paraqet “Fung-wong”, i njohur në vend si “Uwan”.
Autoritetet filipinase kanë konfirmuar se 916,863 persona janë zhvendosur tashmë në zona më të sigurta. Masat e evakuimit janë përqendruar veçanërisht në rajonet bregdetare dhe malore të Ishullit Luzon, ku rreziku i rrëshqitjeve të dheut dhe përmbytjeve është i lartë.
Departamenti i Mbrojtjes Civile u ka kërkuar banorëve të fshatrave në rrezik të largohen nga shtëpitë e tyre para frontit kryesor të tajfunit, që pritet natën e së dielës kundër të hënës.
Në Manila, qeveritë lokale kanë pezulluar të gjitha shkollat dhe zyrat qeveritare, ndërsa linjat ajrore kanë anuluar gati 300 fluturime.
Qeveria ka ngritur strehimore të përkohshme dhe ekipe reagimi ndaj emergjencave të gatshme për t’u përgjigjur në rast të emergjencave të papritura.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
