.png)
Festivali i Këngës në Radio Televizionin Shqiptar rikthehet këtë vit në edicionin e tij të 60-të në datat 27, 28 dhe 29 dhjetor.
Ndërkohë, ka nisur zyrtarisht puna për këtë edicion, me përfundimin e përzgjedhjes së 20 këngëve pjesëmarrëse, përfshirë dhe kategorinë e të rinjve.
Në faqen e RTSH janë listuar këngëtarët dhe grupet pjesëmarrëse.
Këngët që kanë mbërritur në zyrën e RTSH janë renditur përpara komisionit me numra rendorë. Deri më tani nuk ka informacione shtesë në lidhje me autorët apo interpretuesit e tyre.
Nga rezultati i anëtarëve të komisionit të përzgjedhjes së këngëve, përbërë nga Ardit Gjebrea, Elton Deda, Marjan Deda, Klodian Qafoku, Zefina Hasani, Arta Marku dhe Redi Treni në festivalin e 60-të, do të konkurrojnë midis tyre këngët e interpretuara nga:
Alban Ramosaj, Denis Skura, Evi Reçi, Gjergj Kaçinari, Janex (Xhejn Kumrija), Kastro Zizo, Kelly, Mirud, Rezarta Smaja,
Ronela Hajati, Saimir Çili, Stefi dhe Endri Prifti, Shega, Urban Band, Eldis Arrnejti, Ester Zahiri, Kejsi Rrustja, Olimpia Smajlaj, Viola Xhemali dhe Xhuljana Pjetra.
Këtë vit udhëheqësi artistik i festivalit do të jetë kantautori i njohur, Elton Deda. Për të ky pozicion më shumë se sa kënaqësi, është edhe një detyrë e vështirë.
“Detyra e Udhëheqësit Artistik të Festivalit në RTSH është detyrë. Kënaqësia është komplet tjetër. 60-vjetori ku babi im ka derdhur gjak për çdo notë, është detyrim për të bërë diçka që emrin e tij dhe të Rtsh-së ta nderojmë! Të nderojmë asetin më të madh që Rtsh ka, quhet Orkestra Simfonike! Me një Bend fantastik, avash-avash do ndërtojmë një gjë të bukur, një gjë që është larg ulërimave politike, një gjë që është thjesht art për art!”, thotë Deda.
Fituesi i këtij edicioni do të përfaqësojë Shqipërinë në Eurovision, që këtë vit do të mbahet në Itali, pas triumfit të grupit të rrokut “Maneskin”, vitin e shkuar.
Një vit më parë, në edicionin e 59-të u shpall fituese kënga “Karma” kënduar nga Anxhela Peristeri, e cila përfaqësoi Shqipërinë në “Eurovision 2021”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
