.png)
Gazeta Si – Në orët e vona të mbrëmjes Federata Shqiptare e Futbollit ka bërë një sqarim në lidhje me tragjedinë e ndodhur në Rrogozhinë, ku humbi jetën futbollisti Rafael Duamena, pas një sulmi në zemër.
Në sqarimin e FSHF-së theksohet se lojtarit i është dhënë gjithë ndihma e nevojshme mjekësore, pasi ambulanca ishte e pajisur me defibrilator dhe gjithë aparaturat e tjera, sipas protokollit.
Sqarimi i plotë i FSHF-së
Federata Shqiptare e Futbollit dëshiron të sqarojë opinion publik në lidhje me ngjarjen e rëndë të ndodhur në Rrogozhinë gjatë ndeshjes Egnatia-Partizani, ku futbollisti Rafael Duamena ra pa ndjenja në fushë dhe më pas ndërroi jetë.
Në ndeshjen e luajtur në stadiumin e Rrogozhinës është respektuar me rigorozitet rregullorja e garës. Në gatishmëri ka qenë një ambulancë e pajisur me defribilator dhe të gjitha aparaturat e nevojshme mjekësore, si edhe dy doktorë. Futbollistit i është dhënë menjëherë ndihma e shpejtë në fushë dhe është dërguar me urgjencë në spital, ku janë ndjekur të gjitha protokollet mjekësore.
Mjafton të sjellim në vëmendje disa raste të fundit për të dëshmuar se rregullorja zbatohet në përpikmëri në aspektin mjekësor në çdo rast. Në ndeshjen Skënderbeu-Egnatia, stafi mjekësor dhe ambulanca kanë ndërhyrë për t’i ardhur në ndihmë një tifozi që kishte probleme shëndetësore, duke i dhënë ndihmën e parë dhe duke e transportuar më pas në spital. Ndeshja u ndërpre dhe pas kthimit të ambulancës në stadium delegati ka pranuar që loja të rifillojë.
Në ndeshjen Tirana-Laçi të kampionatit të moshave U-17 të datës 10.11.2023 është ndërprerë loja në minutën e 25-të për 30 minuta, pasi është dëmtuar një lojtar i Tiranës në kokë. Është dashur ndërhyrja e ambulancës për ta transportuar në spital dhe vetëm pas kthimit të ambulancës dhe stafit mjekësor ka vazhduar loja.
Në Kategorinë e Dytë, ndeshja Adriatiku-KKS Albanët e datës 28.10.2023, nuk është zhvilluar, pasi ekipi KKS Albanët nuk kishte mjek.
Në Kategorinë e Parë, ndeshja e datës 6 nëntor mes Tomorit dhe Burrelit është ndërprerë, pasi është dërguar në spital një lojtar i Burrelit pas dëmtimit në kokë dhe më pas sërish ka rifilluar me rikthimin e stafit mjekësorë dhe ambulancës.
FSHF u bën thirrje disa mediave, disa individëve të caktuar dhe opinionit publik për këtë ngjarje të rëndë të mos bëjnë raportime të papërgjegjshme dhe të pabazuara në fakte për të shfrytëzuar këtë tragjedi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
