Këtë vit europianët nuk janë më të frikësuar për rezervat e gazit gjatë dimrit, ndonëse çmimet vazhdojnë të jenë tepër të larta.
Vitin e shkuar, që pas pushtimit rus në Ukrainë dhe kontrollit të saj në tregun e gazit, Europa nuk kishte më furnizues gazi, nuk kishte as rezerva dhe u detyrua të reduktojë përdorimin e gazit, lënda kryesore për ngrohje dhe gatim në kontinent.
Sipas publikimit të fundit nga Moody’s, rezervat e gazit të BE-së arritën 97.5% në nëntor 2023, një nivel rekord që e bën pothuajse të pamundur idenë e krizës së gazit për këtë dimër. Madje as për dimrin e ardhshëm.
Qeveritë menaxhuan më mirë rezervat, por edhe familjarët e bizneset, konsumuan më pak gaz, duke ndihmuar në ngritjen e këtyre rezervave.
Raporti thotë që edhe pse rezervat janë plot, çmimi i gazit mbetet tepër i lartë. Rënia në çmimet e energjisë në tërësi (naftë, gaz, elektricitet) ka ndikuar në mënyrë të drejtpërdrejtë tek ulja e inflacioni. Në zonën e euros çmimet e energjisë kanë rënë me 11.5% ndërsa në MB me 31%.
Sipas ekspertëve kjo do të thotë se tregtarët e gazit kanë ende stok gazin e blerë me çmim të lartë dhe se lëvizjet në bursë reflektohen disa muaj me vonesë.
Moody’s thekson se tregu i gazit mbetet delikat përballë risqeve gjeopolitike dhe se një përfshirje e Iranit në konfliktin Izrael-Hamas, do t’i çonte çmimet e gazit në të njëjtin nivel si lufta Rusi-Ukrainë./CNBC
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
