Euro, triumfuesi i paparashikuar i tarifave të Trump

Euro duket se është fituesi i paparashikuar i rregullave të reja ekonomike që ka vendosur Donald Trump.

Monedha ka prekur nivelin më të lartë në 6 muaj kundrejt dollarit, me rritjen më të madhe ditore që prej 2015-s kur Trump njoftoi tarifat globale.

Kërkesa botërore për valutën europiane ka kaluar atë të dollarit për herë të parë që në 2021-shin.

“Po shikojmë një stimul fiskal e monetar nga Europa dhe kjo është arsyeja pse euro po performon mirë” thotë Karen Ward, drejtuese në JP Morgan.

Ngritja e monedhës pasqyron një hakërrim më të gjerë ndaj SHBA-së, pasi politika tregtare e Trumpit “Amerika e para” e vë nën presion perspektivën për ekonominë më të madhe në botë dhe tregjet e saj.

“Euro ka të ngjarë të jetë një nga përfituesit kryesorë të një ngadalësimi ose përmbysjeje të këtyre flukseve hyrëse, për shkak të shkallës në të cilën ato janë ofruar nga investitorët e zonës së euros”, tha Dominic Bunning, një strateg në Nomura, duke shtuar se kishte “hapësirë për një riorganizim strukturor”.

Për të qenë të sigurt, rritja e shpejtë e euros ka lënë shumë njerëz të gatshëm për një tërheqje. Të premten, monedha ra me 0.6%, duke shkurtuar disa nga fitimet e së enjtes për t’u tregtuar me rreth 1.10 dollarë.

Fati i euros u përmirësua që muajin e shkuar kur Gjermania prezantoi planin e saj për shpenzime masive në kuadër të mbrojtjes dhe infrastrukturës, që duket se do ta ndihmojë bllokun të amortizojë efektin e tarifave.

Ekzistojnë gjithashtu disa shqetësime se sa efektivë mund të jenë zyrtarët e BE-së kur bëhet fjalë për mbrojtjen e ekonomisë, duke pasur parasysh procesin e vendim-marrjes të bazuar në konsensus.

Megjithatë, edhe nëse përgjigja e politikës së Europës belbëzon, besueshmëria e vendimmarrjes së SHBA është gjithashtu në pikëpyetje. Formula e vendit për llogaritjen e normave të tarifave befasoi ekonomistët dhe vendet e tjera dhe ishte fokusi i shqyrtimit nga investitorët këtë javë. Strategët e Deutsche Bank AG paralajmëruan për një krizë besimi mbi dollarin./Bloomberg

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.