.png)
Deputeti i PD-së, Ervin Salianji, i cili prej 24 orësh po vuan dënimin me 1 vit burg në Fier, ka nisur betejën ligjore për tu liruar.
Avokatët e Salianjit kane bërë rekurs vendimin e Apelit në Gjykatën e Lartë.
Avokati i Salianjit nënvizon në rekursin drejtuar Gjykatës së Lartë se kërkuesi Ervin Salianjji është deputet i Kuvendit të Shqipërisë dhe njëkohësisht nënkryetar i Grupit Parlamentar të Partisë Demokratike. Ekzekutimi i menjëhershëm i këtij vendimi sjell mbarimin e mandatit të deputetit, në kuptim të nenit 71 të Kushtetutës. E po ashtu, për shkak të Ligjit Për garantimin e integritetit të personave që zgjidhen, emërohen ose ushtrojnë funksione publike”, ekzekutimi i menjëhershëm i këtij vendimi pengon edhe kandidimin e tij në zgjedhjet parlamentare, që do të mbahen në periudhën prill – maj 2025, ku zoti Salianji është caktuar drejtues politik i Partisë Demokratike për qarkun e Elbasanit. Në këtë kuptim, sipas avokatit, është e qartë se ekzekutimi i menjëhershëm i vendimit penal sjell pasoja shumë të rënda për të dënuarin, i cili përveç kufizimit të lirisë, sjell edhe ndërprerjen e menjëhershme të karrierës së tij politike dhe pengon vijimin e kësaj karriere pas kryerjes së dënimit.
“Nga ana tjetër, për shkak se deputeti është përfaqësues i popullit, kjo sjell edhe ndërprerjen e përfaqësimit të qytetarëve të qarkut Korçë në Kuvendin e Shqipërisë, të cilët kanë votuar dhe zgjedhur si përfaqësuesin e tyre deputetin Ervin Salianji në zgjedhjet parlamentare të 25 prillit 2021. Dënimi i një deputeti të Kuvendit të Shqipërisë në detyrë, e veçanërisht dënimi sepse ka kryer një denoncim publik në përmbushje të funksionit të tij si deputet i Partisë Demokratike dhe në ushtrim të lirisë së shprehjes të garantuar Kushtetuta e Konventa Evropiane për të Drejtat e Njeriut, përbën një rast të veçantë, e në këtë kuptim kjo kërkesë është në përputhje edhe me nenin 476, pika 1, gërma “ç”, të Kodit të Procedurës Penale”. Në të tilla kushte, thuhet në kërkesën e Salianjit Gjykata e Shkallës së Parë e Juridiksionit të Përgjithshëm Tiranë, duhet të vendosë shtyrjen e ekzekutimit të vendimit të dënimit, “pasi provohet që ekzekutimi i këtij vendimi sjell pasoja shumë të rënda për deputetin Salianji dhe ndodhemi përpara një rasti të veçantë për shkak të cilësive të veçanta të kërkuesit”:
“Po ashtu, në zbatim të nenit 476, pika 2, të Kodit të Procedurës Penale, gjykata ka të drejtë të pezullojë ekzekutimin e vendimit gjer në shqyrtimin e kërkesës për shtyrjen e ekzekutimit”, thuhet në kërkesë.
Gjithashtu Salianji përmes përfaqësuesve ligjor të tij do të depozitojë në SPAK kallëzim ndaj ish-ministrit, Fatmir Xhafaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
