Të debutosh në Serinë A në moshën 19-vjeçare nuk është aspak e lehtë. Ia ka dalë elbasanasi Kristjan Asllani, mesfushori që luan për Empolin dhe që shumë shpejt do të jetë një vlerë e shtuar edhe për Kombëtaren.
Asllani hyri në fushë bashkë me Nedim Bajramin në minutën e 83-të të ndeshjes me Kaljarin, ku Empoli fitoi me rezultatin 0-2. Ishte fitorja e dytë në kampionat dhe po e dyta në transfertë për këtë skuadër. Po në pjesën e dytë u aktivizua edhe mbrojtësi Ardian Ismajli dhe për Empolin ishin në fushë tre shqiptarë në të njëjtën kohë.
Për herë të parë Bajrami dhe Ismajli e nisën nga stoli ndeshjen, ndërsa aktivizimi i Asllanit është për t’u shënuar në kalendar. Elbasanasi është rritur te akademia e Empolit, ka luajtur për ekipet e moshave dhe tashmë ka marrë edhe besimin e trajnerit Andreacoli te të rriturit.
Asllani ka qenë pjesë e të gjitha kombëtareve të moshave, aktualisht luan për U-21-shin. Trajneri Edi Reja me siguri e ka nën vëzhgim, aq më tepër tani, pas debutimit në Serinë A. 19-vjeçari luan në qendër të mesfushë, përpara mbrojtjes, por edhe më i avancuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
