Gazeta Si – Për të dytën herë brenda më pak se një muaji, Emiljano Shullazi është dërguar sërish në spitalin e QSUT-së për shkak të problemeve shëndetësore.
Drejtoria e Përgjithshme e Burgjeve në bashkëpunim me Policinë e Shtetit ka organizuar lëvizjen e Shullazit nga burgu 313 drejt QSUT për disa kontrolle mjekësore të planifikuara nga mjekët.
Për herë të fundit, ai u dërgua në spital në 23 shkurt të këtij viti nën masa të rrepta sigurie nga forcat speciale RENEA.
Për shkak të rrezikshmërisë që paraqet, ai vuan dënimin i izoluar në regjimin e ashtuquajtur “41 Bis”.
Ai ka kundërshtuar sërish vendimin e Gjykatës së Lartë për qëndrimin brenda izolimit “41 bis”, duke kërkuar ndryshimin e vendimit.
Emiljano Shullazi është dënuar me 14 vite burg nga Gjykata e Posaçme e Apelit. Së bashku me grupin e tij akuzohen për zhvatje pasurie, kërcënim e grup të strukturuar kriminal.
Shullazi akuzohet nga SPAK edhe për vrasjet e bujshme të Vajdin Lames dhe Klodian Saliut, ndërsa SPAK ka dërguar grupin e tij në 15 shkurt për gjykim.
Mes të pandehurve për të cilët SPAK i kërkon gjykatës të dënohet është edhe Luftar Reçi, i njohur si bashkëpunëtori drejtësisë, i cili me rrëfimet e tij ka zbardhur disa krimet të bëra nga grupi kriminal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
