Gazeta Si – Emiljano Shullazi është shtruar në spitalin e burgut. Forca të shumta policie, kanë bërë shoqërimin e tij nga ambientet e burgut 313 në Tiranë, ku ai mbahet i izoluar në sistemin “41 Bis”.
Ai është trasportuar me urgjencë në spitalin e burgut për shkak të problemeve shëndetësore që ka shfaqur.
“Drejtoria e Përgjithshme e Burgjeve, në bashkëpunim me repartet RENEA të Policisë së Shtetit, shoqërojnë të burgosurin Emiliano Shullazi nga burgu 313 drejt QSUT, ku do t’i kryehet një vizitë e planifikuar nga mjekët”, njoftoi këtë të mërkurë në orën 12:00 zyra e shtypit pranë Ministrisë së Drejtësisë.
Prej disa kohësh, Shullazi është në izolim të rreptë, ndërsa edhe takimet me persona të ndryshëm kanë qenë më të pakta. Transportimi i tij ka qenë nën masa të rrepta sigurie nga një automjet i blinduar i RENEA-s
Ai ka kundërshtuar sërish vendimin e Gjykatës së Lartë për qëndrimin brenda izolimit “41 bis”, duke kërkuar ndryshimin e vendimit.
Shullazi dhe grupi i tij është dënuar me 55 vite burg në total me akuzën e ngritjes së grupit kriminal, vendim i dhënë nga Gjykata për Krimet e Rënda. Ai vuan vuan dënimin prej 14 vite burg për akuzën e gjobëvënies ndaj biznesmenit Ylvi Beqja.
Ndërkaq, me 12 vite burg u dënua Gilmando Dani, Indrit Qyqja me 10 vite, Indrit Zela me 10 vite dhe Blerim Shullazi me 9 vite burg.
Shullazi akuzohet nga SPAK edhe për vrasjet e bujshme të Vajdin Lames dhe Klodian Saliut, ndërsa SPAK ka dërguar grupin e tij në 15 shkurt për gjykim.
Mes të pandehurve për të cilët SPAK i kërkon gjykatës të dënohet është edhe Luftar Reçi, i njohur si bashkëpunëtori drejtësisë, i cili me rrëfimet e tij ka zbardhur disa krimet të bëra nga grupi kriminal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
