.png)
Nuk ka ende prova të mjaftueshme për të miratuar dozën e katërt të Covid-19, sipas kreut të Strategjisë së Vaksinave të Autoritetit Mjekësor Evropian (EMA), Marco Cavaleri, ndërsa Pfizer tashmë ka aplikuar për autorizim për injeksione shtesë.
Evropa ka një shkallë të lartë vaksinimi, me mbi 70% të evropianëve të vaksinuar me dy doza dhe gjysma marrin një dozë përforcuese. Por kur bëhet fjalë për doza shtesë përforcuese, EMA e ka konsideruar të panevojshme dozën e katër.
“Ju keni parë deklarata nga disa zhvillues vaksinash për të theksuar nevojën për një injeksion të dytë përforcues. Dua të ritheksoj se nga pikëpamja rregullatore, nuk ka ende prova të mjaftueshme as nga provat klinike, as nga provat e botës reale që mbështesin rekomandimin mbi nevojën për një dozë të katërt në popullatën e përgjithshme”, tha Cavaleri.
Ndërsa Izraeli kryeson në përqindjet e vaksinimit dhe ishte i pari që filloi administrimin e dozave të katërta në fund të dhjetorit 2021, të gjithë rregullatorët e mjekësisë dhe shkencëtarët po vëzhgojnë zhvillimet.
“Ne nuk shohim realisht një rritje, por shohim një rivendosje të nivelit të antitrupave”, tha ai, duke shtuar se “parandalimi i infeksionit ishte mjaft i kufizuar”. Për shkak të kësaj, Cavaleri theksoi se nuk mund të ketë “një përfitim të madh nga administrimi i një injeksioni të dozës së katërt në këtë moment” për të rinjtë.
Por ndërkohë që EMA po mbledh prova, disa vende të BE-së kanë prezantuar tashmë fushatën për vaksinimin me doza të katërta. Më 3 mars, Cavaleri njoftoi se disa shtete anëtare kishin filluar të jepnin një dozë të katërt për të moshuarit mbi 70 ose 80 vjeç.
“Kjo qasje do të justifikohet me faktin se të moshuarit janë më të cenueshëm se të rinjtë,” tha ai.
Të martën (15 mars) Pfizer aplikoi për autorizim në Administratën e Ushqimit dhe Barnave të SHBA-së (FDA) për Autorizimin e Përdorimit Urgjent të një doze të katërt për të rriturit 65 vjeç e lart, të cilët kanë marrë një dozë të tretë.
“Deri më tani, EMA nuk ka marrë asnjë aplikim për një dozë të katërt,” tha Cavaleri.
Burimi:Euractiv/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje