Gazeta Si – Elbasani dhe Bylis janë zyrtarisht pjesë e Superiores së sezonit të ardhshëm. Me fitoret e sotme, këto dy skuadra që kanë dominuar kampionatin, kanë siguruar matematikisht kthimin në elitën e futbollit shqiptar.
Nëse për Bylisin vitet e fundit kanë qenë si një ‘ashensor’, me ngjitje-zbritje ka Superiorja, për Elbasanin është një rikthim i veçantë. Një nga skuadrat me traditë të futbollit shqiptar, fituese e dy titujve kampionë në histori, ka vuajtur për shumë vite, duke kaluar jo pak peripeci.
Me emrin e ri AF Elbasani, për shkak të disa probleme ligjore me të kaluarën, këtë sezon u bë organizimi i duhur pasi u sigurua mbështetja e duhur financiare, ndërsa drejtimi teknik i skuadrës iu besua Nevil Dedes, kampion si lojtar me Elbasanin.
Dhe rezultati nuk vonoi, duke u finalizuar sot me rikthimin në elitën e futbollit shqiptar. Elbasani i ka munguar Superiores, pasi është një nga qytetet që mbushin më shumë stadiumin. Mjafton të themi se ka pasur ndeshje me 7 mijë tifozë në stadium edhe në Kategorinë e Parë.
Edhe Bylisi, i drejtuar nga Arjan Bellai, feston sot rikthimin e shpejtë në Superiore pas rënies një vit më parë. Ballshiotët janë brë tashmë ekspertë të Kategorisë së Parë dhe pas një paraqitjeje shumë të mirë, tashmë kanë në dorë ‘biletën’ e Superiores.
Nga Kategoria e Parë në Superiore mund të ngjitet edhe një skuadër e tretë, që del nga faza e ‘play-off’-it dhe në fund bën një ndeshje shtesë me vendin e 8-të të kampionatit elitar. Këtë rrugë të vështirë shpreson të ndjekë Flamurtari i Vlorës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
