.png)
Gazeta Si – Bujar Shega, i cili është pjesë e grupit kriminal të Suel Çelës, është ekstraduar këtë të enjte nga Italia drejt autoriteteve të drejtësisë shqiptare.
Në njoftimin e policisë, thuhet se 52-vjeçari ishte i shpallur në kërkim ndërkombëtar, pasi Gjykata Kundër Korrupsionit dhe Krimit të Organizuar ka caktuar ndaj tij masën e sigurisë “arrest në burg”.
Sipas SPAK, Bujar Shega ishte një nga anëtarët me rol kyç në grupin e Suel Çelës, pasi ishte i angazhuar në planifikimin dhe ekzekutimin e veprave të rënda penale, përfshirë vrasje me paramendim dhe trafikun e narkotikëve.
Gjykata e Posaçme e akuzon për veprat penale “Trafikimi i lëndëve narkotike” dhe “Pastrimi i produkteve të veprës penale ose veprimtarisë kriminale”, kryer në kuadër të grupit të strukturuar kriminal.
Shega dyshohet se pastronte paratë e grupit të Suel Çelës përmes dy kompanive të tij të pastrimit në qytetin Elbasan.
Ndërkohë, SPAK e akuzon Suel Çelën për porositjen e dy atentateve, detaje që janë zbuluar në dosjen “Plumbi i artë”.
Nga dëshmitë e të penduarit të drejtësisë, Nuredin Dumani, prokuroria mësoi se Suel Çela ishte organizatori i dy atentateve të dështuara, atë ndaj Elton Kikisë dhe Lulzim Mashës.
Ndaj 36-vjeçarit ka dhe një tjetër masë “arrest në burg”, në kuadër të aksionit që u zhvillua në fund të nëntorit 2024.
Përmes zbërthimit të aplikacionit “Sky Ecc”, rezultoi se Suel Cela kishte lidhje me njerëz të drejtësisë dhe të policisë, si ish-gjyqtarja Pajtime Fetahu apo ish-shefi i Krimeve në Komisariatin nr.6, Dedan Gjoni.
Ai ndikonte për t’i lehtësuar masën e sigurisë anëtarëve të grupit kriminal që drejtonte. Çela akuzohet se drejtonte edhe grupin e trafikut të kokainës nga vendet e Amerikës Latine drejt Bashkimit Evropian.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
