Gazeta Si – Nuk ka fitues në ndeshjen mes dy skuadrave kryesuese të kampionatit, Egnatias dhe Partizanit. Në stadiumin e Rrogozhinës u luajtën sot 66 minutat e mbetura të ndeshjes së 11 nëntorit, ku sulmuesi ganez Rafael Duamena u nda tragjikisht nga jeta, pas një sulmi në zemër.
Dhe ishin nderimet për këtë futbollist, që tek Egnatia mbante edhe shiritin e kapitenit, që i paraprinë ndeshjes. Tufa me lule, një portret i tij dhe madje një këngë kushtuar nga klubi rrogozhinas.
Pavarësisht rasteve të shumta që prodhoi loja, nuk u shënua asnjë gol dhe dy skuadrat mbyllën gjithçka në barazim, 1-1, aq sa ishte rezultati që më 11 nëntor, kur kishin shënuar Malota dhe Bintsouka.
Partizani i luajti minutat e fundit me 10 lojtarë, sepse mbrojtësi Bytyçi pësoi një dëmtim në gju dhe la fushën me ndihmën e stafit mjekësor.
Me këtë barazim, Egnatia dhe Partizani vazhdojnë të kryesojnë së bashku, me nga 27 pikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
