Edhe Universal Music do të krijojë koleksionin e tij të NFT-ve

Universal Music Group ka arritur një partneritet me platformën NFT Curio për të zhvilluar koleksione NFT-sh për markat e artistëve.

Marrëveshja është një lëvizje e madhe drejt një rryme potencialisht të re të ardhurash nga kompania më e madhe muzikore në botë, e cila, ashtu si rivalët e saj, varet shumë nga transmetimi i muzikës për mbijetesën e saj financiare.

Universal Music tha se planifikon të punojë me Curio për të zhvilluar vepra arti dixhitale dhe koleksione të tjera për kompaninë dhe artistët e saj. Curio gjithashtu do të shërbejë si një dalje në internet ku fansat mund të blejnë NFT të licencuara zyrtarisht, duke filluar nga marsi me një bashkëpunim nga Capitol Music Group dhe kantautorin britanik Calum Scott.

Michael Nash, nënkryetari ekzekutiv i Universal Music Group tha se NFTs dhe Web3, gjenerata e ardhshme e internetit e ndërtuar mbi teknologjinë blockchain, paraqesin një mundësi për artistët që të krijojnë produkte dixhitale unike për fansat në një kohë kur transmetimi dhe aksesi në muzikë janë kudo.

“Me gjithë risitë që ndodhin rreth Web3 dhe NFT-ve, ne kemi mundësinë të vëmë në dispozicion të gjitha llojet e produkteve dixhitale”, tha Nash.

Universal ka eksploruar në mënyrë aktive mënyra për të përfituar nga popullariteti në rritje i koleksioneve dixhitale, duke arritur deri aty sa të formojë një grup muzikor, Kingship, i përbërë tërësisht nga personazhe simian nga marka NFT Bored Ape Yacht Club. Majmunët e animuar, të cilët jetojnë si sende unike në zinxhirin dixhital, janë bërë një aset i lakmuar për të famshëm të Hollivudit dhe koleksionistë të tjerë.

Partneriteti përfaqëson një moment historik për Curio, i cili u themelua në 2020 dhe hodhi NFT-në e tij të parë shkurtin e kaluar. Kompania më pas ka lëshuar më shumë se 75,000 koleksione dixhitale duke punuar me partnerë të industrisë së muzikës, filmave dhe televizionit.

Platforma përmban NFT-të e frymëzuara nga seria televizive “American Gods” e Neil Gaiman dhe klasikja kult e vitit 2010 e Universal Pictures “Scott Pilgrim vs. The World”.

Curio ndërtoi tregun e tij NFT në mënyrë që të ishte i aksesueshëm për konsumatorët e zakonshëm, përfshirë ata që nuk kanë përdorur kurrë kriptomonedhë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.