.png)
Për herë të parë, një pacient me fazë të avancuar të Parkinson ka mundur të ecë për rreth 6 km pa probleme, me ndihmën e një implanti që stimulon nervat në shtyllën kurrizore.
Marc Gauthier, 63 vjeç nga Bordo, Francë është personi i parë që provon pajisjen për të cilën thotë se i ka dhënë një mundësi të dytë në jetë. Tashmë ai mund të përshkojë kilometra, ndërsa më parë duhej të qëndronte në shtëpi dhe rrëzohej disa herë në ditë.
Risia e shkencës dhe mjekësisë është botuar në Nature Medicine. Përpara implantit, Gauthier thotë se e ka pasur shumë të vështirë të qëndrojë në këmbë për një kohë të gjatë apo të ngjisë shkallë.
Trajtimi ka ndaluar “ngrirjen” që pacientët me sëmundjen e Parkinsonit përjetojnë dhe kur pajisja është e ndezur, ecja e pacientit duket tërësisht normale.
“Të hipësh në një ashensor tingëllon e thjeshtë por për mua ishte e pamundur më parë”, thotë 63-vjeçari.
“Tani s’e kam problem. E ndez stimuluesin në mëngjes dhe e fik në darkë. Kjo më ndihmon të eci më mirë dhe të stabilizohem. Tani nuk kam më frikë as nga shkallët. Çdo të diel, shkoj te liqeni dhe përshkoj rreth 6 km. Është e pabesueshme”.
Stimuluesi vendoset në pjesën lumbare të shpinës kurrizore prej së cilës dërgon mesazhe te muskujt e këmbëve. Gauthier mundet ta kontrollojë sepse është truri ai që e udhëzon, por implanti prodhon sinjale elektrike për një rezultat më të mirë.
Trajtimi nuk është një kurë sepse Parkinsoni është sëmundje që përkeqësohet. Truri i personave që vuajnë prej tij nuk ka mjaftueshëm dopaminë sepse disa prej qelizave nervore që e prodhojnë nuk funksionojnë më.
Simptomat e Parkinsonit shfaqen me dridhje të pavullnetshme të disa pjesëve të trupit, lëvizje të ngadalta dhe ngurtësim të muskujve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
