Nga Gazeta ‘Si’ - ‘E premtja 13 për Serbinë’, ka shkruar media serbe Novosti, duke e konsideruar si ‘ters’ shortin e hedhur këtë të premte në Zvicër i cili e vendosi Serbinë në një grup me Shqipërinë, Anglinë, Letoninë dhe Andorën për kualifikueset e Kupës së Botës 2026.
Novosti e ka quajtur këtë ditë ters, sipas bestytnisë që kur data 13 bie në ditë të premte, pritet të ndodhin gjëra negative.
Edhe mediat e tjera serbe e kanë komentuar si një grup shumë të vështirë duke veçuar pikërisht Anglinë, por edhe Shqipërinë.
“Rrugë e vështirë drejt Botërorit”, ka shkruar “Kurir”.
“Ne luajtëm kundër Anglisë në Kampionatin Evropian dhe humbëm 1:0. Ndeshjet kundër Shqipërisë do të jenë veçanërisht gjithashtu të vështira për arsye të njohura”, shkruan më tej ajo, referuar ndeshjes së 2014-s e cila u ndërpre në fund të pjesës së parë, për shkak të futjes së tifozëve serbë në fushë dhe përleshjes me lojtarët shqiptarë.
Ndërkohë, “B92” shkruan: Do të jetë ferr.
Çfarë ndodhi në ndeshjen e 10 viteve më parë?
Më 14 tetor 2014, ndeshja mes Serbisë dhe Shqipërisë, pjesë e kualifikueseve të Euro 2016, u ndërpre në orën 21:27, pas futjes në fushë të tifozëve serbë, të cilët u përleshën me lojtarët e kombëtares sonë.
UEFA nuk kishte lejuar pjesëmarrjen e tifozëve shqiptarë në ndeshje për arsye sigurie. Pasi vërshëllyen himnin tonë kombëtar dhe bërtitën thuajse gjatë gjithë kohës “Vritini shqiptarët”, tifozët serbë bënë që takimi të ndërpritej në mes.
Në minutën e 42-të, një dron me flamurin shqiptar dhe portretet e Ismail Qemalit dhe Isa Boletinit u shfaq mbi stadium. Pasi një lojtar serb e mori flamurin, lojtarët e Shqipërisë iu afruan për t’ia marrë nga dora. Tensioni mes futbollistëve në fushë degjeneroi në një sherr masiv, pasi - pavarësisht pranisë së shtuar të forcave të sigurisë - tifozë serbë u futën në fushë duke goditur lojtarët tanë.
Lojtarët shqiptarë nuk pranuan të dilnin më në fushë dhe u kthyen në Tiranë rreth orës 3 të mëngjesit.
Beteja kaloi nga fusha e lojës në burokracitë e UEFA-s. Kjo e fundit vendosi më 24 tetor 2014 që ndeshja të fitohej 3-0 në tavolinë nga Serbia, meqë shqiptarët nuk pranuan të luanin. Por një vit më vonë, tri pikët iu akorduan Shqipërisë, pas vendimit në Gjykatën e Arbitrazhit Sportiv (CAS).
Edhe përmes këtij rezultati në tavolinë, Shqipëria arriti të sigurojë kualifikimin historik për në Kampionatin Europian të vitit 2016, që zhvillohej në Francë.
Autorësinë e fluturimit të dronit mbi stadiumin e Beogradit e mori Ismail Morina, i njohur si Ballisti.
Sot, një dekadë më pas, pavarësisht tensioneve politike që lidhen kryesisht me Kosovën, Shqipëria dhe Serbia kanë aplikuar për të organizuar bashkë Europianin U-21, që do të zhvillohet në vitin 2027. UEFA nuk ka dhënë ende një përgjigje zyrtare edhe pse kjo është kandidatura e vetme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
