.png)
Gazeta Si – Fotoja dhe videoja e një personi të maskuar, të siguruar nga Gazetasi.al, i cili dyshohet se është autori i vrasjes së 58-vjeçarit Renato Hoxhaj pak ditë më parë në Vlorë, ka rritur mundësinë që grupi i hetimit të zbulojë ngjarjen kriminale.
Në pamje duket një person me kapuç, i cili largohet nga rrugica ku u krye edhe ekzekutimi i viktimës.
Burime nga grupi hetimor bëjnë me dije se vrasësi ishte i pajisur me një maskë silikoni që i mbulonte të gjithë fytyrën.
Ai kishte vendosur një bark artificial, si dhe kishte mbajtur maskë anti-Covid të zezë dhe kapele për të fshehur çdo detaj të identitetit të tij.
Ndërsa mëngjesin e kësaj të mërkure, për këtë ngjarje të rëndë u arrestua një i ri, i cili dyshohet të ketë bashkëpunuar në këtë vrasje.
Bëhet fjalë për Eris Mehmetin, i cili sipas burimeve policore dyshohet se ka vënë në dispozicion të vrasësit, automjetin e tij. Ai u ndalua pas hetimit të Policisë së Vlorës, e cila identifikoi makinën me të cilën lëvizi vrasësi.
Në përpjekje për të humbur gjurmët, automjetit të Mehmetit i ishin vendosur një palë targa të tjera të vjedhura.
Në momentin e ndalimit, policia i ka sekuestruar Mehmetit edhe aparatin celular ky dyshohet se mund te ketë biseda me autorët e dyshuar. Mehmeti rezulton mik i Roan Brahimit, i cili u ekzekutua në maj 2024 në Greqi.
Sakaq, burimet policore bëjnë me dije se ka edhe një person të dyshuar si autor i vrasjes së Renato Hoxhajt, por që dyshohet se pas krimit të jetë larguar drejt Greqisë. Është pikërisht ky personi që shfaqet në video, duke u larguar pas vrasjes.
Gjithnjë sipas burimeve, vrasja e Hoxhajt, i cili punonte si roje në një objekt ndërtimi në Vlorë, dyshohet se është porositur nga Emiratet e Bashkuara Arabe.
Ndonëse ende nuk ka një pistë zyrtare të deklaruar, burimet pranë grupit të hetimit shprehen se motivet e ekzekutimit të 58-vjeçarit kanë të bëjnë me ngjarje të mëparshme kriminale në qytetin e Vlorës, ku i ndjeri dyshohet që mund të ketë luajtur rolin e informatorit mes grupeve rivale kriminale.
Dhe për këtë arsye dyshimet janë që vrasja e tij mund të jetë porositur nga jashtë vendit. Gjithsesi arrestimi i një prej bashkëpunëtorëve të dyshuar pritet që të përforcojnë më shumë pistat e ngritura të cilat duket se po çojnë në zbardhjen e kësaj vrasjeje, e cila në momente e para dukej sikur ishte kryer pa lënë gjurmë.
Hoxhaj kishte disa kohë që ishte divorcuar nga gruaja dhe bashkëjetonte me një grua tjetër. Ai punonte si roje në një biznes në Vlorë.
Renato Hoxhaj u ekzekutua mëngjesin e datës 27 prill me 3 plumba, 2 prej të cilave në kokë dhe 1 në kraharor.
Për ngjarjen policia u njoftua nga bashkëjetuesja e viktimës, e cila e gjeti të pajetë në rrugicë, rreth 2 orë pas krimit.
Në dëshminë e saj në polici, bashkëjetuesja e të ndjerit u shpreh se i dëgjoi të shtënat kur ndodhej në shtëpi, por i konsideroi si fishekzjarre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
