Hetimi për vdekjen e Sir David Amess, deputetit konservator britanik, i cili u godit me thikë për vdekje të premten më 15 tetor, ndërsa takonte zgjedhësit e tij në një kishë metodiste në Leigh-on-Sea, Essex, është në duart e forcave antiterroriste të Londrës .
Sipas asaj që u zbulua nga Policia Metropolitane në një shënim të publikuar në orët e para të së shtunës, ajo kundër Amess, ishte një sulm terrorist dhe “rezultatet e para të hetimit zbuluan një pistë të lidhur potencialisht me ekstremizmin islamik”.
Personi i arrestuar për vrasjen është një 25-vjeçar i cili, siç zbulohet nga “SkyNews” dhe raportohet nga agjencitë ndërkombëtare të lajmeve, është një shtetas britanik me origjinë somaleze. Identiteti i personit të arrestuar nuk dihet për momentin.
Sipas burimeve të zbuluara për “The Guardian”, i riu ishte deri diku i njohur për policinë. Emri i tij dyshohet se ishte në bazën e të dhënave të skemës “Prevent”, programi që mbledh informacione mbi subjektet e konsideruara në rrezik radikalizimi.
Policia britanike nuk është në kërkim të bashkëpunëtorëve të mundshëm të 25-vjeçarit, edhe pse mëngjesin e të shtunës u kryen dy kontrolle në dy shtëpi në Londër.
Arma me të cilën u vra Amess – 69 vjeç, katolik, i martuar dhe me 5 fëmijë, deputet që nga viti 1983, fytyrë e njohur e politikës britanike pavarësisht se kurrë nuk kishte pasur role qeveritare, përkrahës i Brexit dhe të drejtave të kafshëve, si dhe anti-abortist – u gjet nga policia menjëherë pas goditjes me thikë, e cila ndodhi në pak sekonda rreth mesditës e së premtes.
Sir David po bisedonte me bashkëqytetarët e tij, kur vrasësi, i cili priste ulur, papritmas e goditi me thikë. Pas sulmit, burri u ul përsëri sikur të mos kishte ndodhur asgjë, pa luftuar apo ikur. Ndihma ishte e padobishme, edhe pse e menjëhershme: Amess vdiq para se të mund të transportohej në spital.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
