.png)
Gazeta Si – Dy persona janë vënë në pranga këtë të enjte si të dyshuar për zjarrvënie në Shijak dhe Shkodër.
Policia thotë se një 38-vjeçar me iniciale M.M., dyshohet se ka ndezur zjarr për të djegur disa shkurre, ku si pasojë e përhapjes së flakëve, ka djegur një sipërfaqe toke dhe 1 mijë pemë ulliri në Shijak.
Ndërhyrja e zjarrfikësve dhe shërbimeve të Policisë, mundësoi neutralizimin e flakëve të zjarrit. Materialet procedurale i kaluan Prokurorisë së Durrësit, për veprime të mëtejshme, për veprën penale “Shkatërrimi i pronës me zjarr”.
Më pas, një 64-vjeçar u arrestua në Shkodër, pasi si pasojë e një zjarri që ka ndezur në një sipërfaqe toke ka shkaktuar dëme duke djegur edhe një stallë bagëtish dhe disa koshere bletësh.
Sipas asaj që njoftojnë blutë zjarri ka rënë në fshatin Pentar të Shkodrës.
“Policia identifikon dhe vë në pranga një shtetas të dyshuar për zjarrvënie në fshatin Pentar. Në vijim të punës hetimore për identifikimin dhe kapjen e autorëve të zjarrvënieve, si rezultat i informacioneve dhe provave të siguruara nga Komisariati i Policisë Shkodër, u bënë identifikimi dhe ndalimi i shtetasit:
-M. Gj., 64 vjeç, banues në fshatin Mali i Gjymtit. Ky shtetas dyshohet se ka ndezur zjarr në një sipërfaqe toke në fshatin Pentar dhe nga përhapja e flakëve janë djegur një sipërfaqe toke e mbjellë me pemë frutore, një stallë bagëtish dhe disa koshere bletësh”, njofton policia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
