Dy recesione globale në një dekadë? Nuk ka ndodhur në më shumë se 80 vjet

Ekonomia globale është vetëm një goditje më shumë larg një recesioni të dytë në të njëjtën dekadë, diçka që nuk ka ndodhur në më shumë se 80 vjet.

Ky është paralajmërimi i fundit nga Banka Botërore, e cila të martën(10 janar) uli ndjeshëm parashikimin e saj për rritjen ekonomike globale.

BB parashikon që ekonomia botërore do të zgjerohet me vetëm 1.7% këtë vit, duke goditur vendet në zhvillim që tashmë janë goditur rëndë nga pandemia dhe rritja e normave të interesit. Ajo parashikon se rritja do të rritet deri në 2.7% në 2024.

“Kriza me të cilën përballet zhvillimi po intensifikohet ndërsa perspektiva e rritjes globale përkeqësohet”, tha në një deklaratë presidenti i Bankës Botërore, David Malpass.

Inflacioni i ngritur, politika agresive e bankës qendrore, përkeqësimi i kushteve financiare dhe valët tronditëse nga pushtimi rus i Ukrainës po rëndojnë të gjitha mbi rritjen.

Si rezultat, “goditjet e mëtejshme negative” – nga inflacioni më i lartë, politika monetare edhe më e shtrënguar deri tek rritja e tensioneve gjeopolitike – mund të jenë të mjaftueshme për të shkaktuar kushte recesioni, sipas Bankës Botërore.

Ekonomia globale u tkurr me 3.2% gjatë recesionit pandemik të vitit 2020, përpara se të rikthehej fuqishëm në 2021. Bota përjetoi për herë të fundit dy recesione në të njëjtën dekadë në vitet 1930 .

Organizata tha se pret që ekonomia e SHBA të rritet me vetëm 0.5% në 2023. 20 vendet që përdorin euron, të cilat janë goditur nga lufta në Ukrainë, nuk pritet të shohin fare zgjerim të përgjithshëm. Të dy parashikimet janë shumë më të ulëta se sa ishin në qershor 2022.

Rritja në Kinë parashikohet të rritet në vitin 2023 pas heqjes së kufizimeve të Covid-19 , duke u rritur në 4.3%. Por ky parashikim është gjithashtu në rënie nga gjashtë muaj më parë, duke reflektuar lëkundjet e vazhdueshme në tregun e pasurive të paluajtshme të vendit, kërkesën më të dobët nga vendet e tjera për produkte të prodhuara në Kinë dhe ndërprerjet e vazhdueshme pandemike.

“Tre motorët kryesorë të rritjes në botë – Shtetet e Bashkuara, Eurozona dhe Kina – po kalojnë një periudhë dobësie të theksuar”, tha Banka Botërore në raportin e saj.

Kjo tërheqje do të dëmtojë gjithashtu vendet më të varfra, të cilat tashmë kanë ndjerë efektet e një klime të pasigurt ekonomike, investimeve më të ulëta të biznesit dhe rritjes së normave. Rritja e kostove të huamarrjes mund ta bëjë më sfiduese përballimin e niveleve të larta të borxhit.

Deri në fund të vitit 2024, prodhimi ekonomik në tregjet në zhvillim dhe ekonomitë në zhvillim do të jetë rreth 6% nën nivelet që ishin përcaktuar përpara pandemisë, sipas Bankës Botërore.

Rritja e të ardhurave pritet gjithashtu të jetë më e ngadaltë se mesatarja në dekadën para Covid-it, duke e bërë më të vështirë mbylljen e hendekut me kombet më të pasura.

Burimi: CNN Business/Përshtati Gazeta Si

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.