.png)
Durrës – Një 29-vjeçar me precedentë të mëparshëm penal, Ermir Dedja, u ekzekutua në një atentat me armë zjarri pak pas mesnatës së të martës në lagjen nr.18 të Durrësit.
Sipas policisë, i riu u qëllua në breshëri nga disa persona të maskuar, të cilët më pas u larguan nga vendngjarja me një makinë, e cila u gjet mëngjesin e sotën e djegur në fshatin Gërdec.
Në videon e siguruar nga GazetaSi.al, shihet një makinë e bardhë tip “Seat”, e cila afrohet me qetësi, nga ku dyshohet se autorët kanë qëlluar me armë zjarri drejt Dedjes.
Në pamje, dëgjohen të shtënat, ndërsa dy qytetarë vrapojnë të tmerruar. “Ku je? Hajde këtej nga unë, hajde këtej!”, dëgjohet teksa bërtet njëri prej tyre.
Ngjarja ka ndodhur pranë qendrës shëndetësore të lagjes, ku viktima po lëvizte në këmbë, i veshur me kostum sportiv.
Personat e maskuar kanë shfrytëzuar momentin që ai po ecte në trotuarin e një pallati dhe e kanë qëlluar me armë automatike nga pas, në zonën e shpatullave, bëhet me dije sipas burimeve.
Ai u dërgua në spitalin e Durrësit ku iu konstatuan dy plagë, në gjoks dhe në kurriz. Plumbi që mori në gjoks rezultoi fatal, pasi përshkoi aortën, duke i shkaktuar humbjen e jetës.
Viktima, për t’iu shmangur plumbave ka tentuar të futet në qendër Shëndetësore, por nuk ia ka dalë. Shenjat e plumbave janë dhe në derën prej xhami të qendrës shëndetësore.
“Skenari” i krimit mbetet i njëjtë, autorët zhduken pa gjurmë dhe djegin automjetin diku larg vendngjarjes.
Policia e Durrësit dhe ajo e Tiranës, kanë gjetur në fshatin Gërdec pranë Vorës, një automjet të djegur dhe brenda tij një armë zjarri, të cilat dyshohet se janë përdorur nga autorët e kësaj ngjarjeje.
Nga informacionet e para, autorët kanë qenë në gjurmim të viktimës dhe pasi janë koordinuar për itenerarin e tij, kanë sinjalizuar njëri-tjetrin për të kryer vrasjen e tij dhe më pas janë larguar nga vendi i ngjarjes me një automjet.
Viktima, me origjinë nga Shijaku, por banues në Durrës, jetonte në një banesë në lagjen nr. 11 i vetëm. Ai rezulton person me precedentë penalë.
Në vitin 2023 u dënua me 7 muaj burg për kundërshtim të punonjësit të policisë së rendit publik, ndërsa më herët, në 2021, për largim nga vendi i aksidentit. Në vitin 2017 u dënua me 8 muaj burg për armëmbajtje pa leje dhe mbajtje thike.
Në këtë çështje, ai qe arrestuar dhe për një tjetër vepër penale, por Dedja u shpall i pafajshëm për akuzën e përkrahjes së autorit të një plagosjeje në Shijak.
Emri i tij përmendet për herë të parë në vitin 2015, kur, në moshën 19-vjeçare, u ndalua për prodhim dhe shitje të lëndëve narkotike, marijuanë, së bashku me dy persona nga Hasi, të cilët tentuan ta trafikonin drogën, e blerë tek Dedja, drejt Kosovës.
Pikërisht tregtia e drogës mes grupeve kriminale në Durrës, është pista kryesore ku është fokusuar policia, e cila deri në mesditën e kësaj të marte nuk ka pasur asnjë person të arrestuar për këtë ngjarje.
Hetimet për vrasjen e 29-vjeçarit vijojnë, ndërsa pista kryesore dyshohet se lidhet me larjen e hesapeve mes personave me të kaluar kriminale, ndërsa nuk përjashtohen dhe pista të tjera.
Aktualisht, policia dhe Prokuroria e Durrësit ka sekuestruar disa gëzhoja automatiku, pamje filmike dhe administruar disa dëshmi, por asgjë nuk ka shërbyer për identifikimin e autorëve të këtij krimit të rëndë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
