‘Duhet vullnet i përbashkët përtej fjalëve’. Rama kritikon vendet e mëdha për braktisjen e Konferencës së Klimës

Nga Gazeta 'Si'- Kryeministri i Shqipërisë Edi Rama ka folur nga Azerbajxhani në Konferencën e Kombeve të Bashkuara për Ndryshimet Klimatike.

Rama kritikoi vendet e mëdha për bojkotim të kësaj konference dhe shprehu pasigurinë për të ardhmen e kësaj iniciative.

“Vendosa të lë mënjanë fjalimin tim të mirëpërgatitur, sepse ndërkohë që prej ditës së djeshme, shihja ekranet e heshtura të televizorëve në sallën e pritjes së udhëheqësve ku organizatorët kishin menduar me kujdes të shtonin bimë të gjelbra mbi kolltukët e rehatshëm, njerëzit aty hanë, pinë, takohen dhe bëjnë foto së bashku.

Ndërsa pamje fjalimesh pa zë nga udhëheqësit vazhdojnë të shfaqen vazhdimisht në sfond.Mua kjo më duket saktësisht si ajo që ndodh në botën reale çdo ditë. Jeta vazhdon me zakonet e saj të vjetra dhe fjalimet tona të mbushura përplot me fjalë të mira për të luftuar ndryshimin e klimës. Nuk ndryshojnë asgjë.

Edhe më keq, ashtu siç Sekretari i Përgjithshëm i Kombeve të Bashkuara e theksoi dje, emetimet e karbonit faktikisht janë rritur gjatë këtij viti nga COP-i i mëparshëm deri tek ky aktual në vend që të ulen dhe objektivat ambicioze po shtyhen edhe një herë në një botë që gjithmonë e më shumë është e çoroditur e thellësisht e ndarë.

Vij këtu nga një vend i vogël në mes të Europës, Shqipëria, ku jemi krenar që kemi prodhim 100 % me energji të ripërtëritshme. Por çfarë nënkupton kjo për të ardhmen e botës nëse ndotësit më të mëdhenj vazhdojnë punën e tyre si përherë? ", tha Rama.

Ai tha se nuk po i jep leksion ndonjërit, duke qenë se referuar tij, jemi mësuar që të na bëjnë leksione, por shtoi se ideja e tij është se çfarë po arrihej në këto mbledhje njëra pas tjetrës, nëse nuk ka vullnet politik në horizont për të shkuar përtej fjalëve.

"Për një kohë të gjatë, ne shqiptarët jetuam nën mallkimin e një historie mizore që na la në izolim të plotë pa asnjë të drejtë, pa asnjë liri lëvizjeje, pa asnjë shpresë për të ardhmen. Ndërkohë që së fundmi jemi të bekuar me shoqërinë e BE dhe për herë të parë në histori liritë, ëndrrat dhe shpresat janë bërë pjesë e jetës sonë, por ajo çfarë po ndodh në Europë dhe në botë sot nuk lë shumë hapësirë për optimizëm dhe pse optimizmi është e vetmja mënyrë mbijetese që njohim ne shqiptarët .

Ndërkohë që pamja ime pa zë shfaqet në ekranet e heshtura të sallës së bukur të pritjes pas kësaj dhome, dua ta përfundoj duke përmendur një histori nga Enes bin Malik, Allahu qoftë i kënaqur me të- meqë ra fjala unë jam katolik - i cili tregoi se profeti Muhamed, paqja qoftë mbi të, thoshte që 'Nëqoftëse dita e gjykimit vjen, ndërkohë që njeri prej jush ka një fidan në dorë, nëse mundet ta mbjellë përpara se ajo të vijë, atëherë le ta mbjellë', tha Rama.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.