.png)
Nga Gazeta ‘Si’- Parlamenti Europian ka publikuar draft-raportin e fundit për Shqipërinë, ku vlerësohet progresi në rrugën drejt integrimit por evidentohen edhe sfidat që kërkojnë reforma më të thelluara.
Sipas draft-raportit, sfidë kryesore për Shqipërinë mbetet sundimi i ligjit dhe lufta kundër korrupsionit.
Projekt-rezoluta konfirmon avancimin e vendit në hapjen e të gjithë grup-kapitujve të negociatave, ndërsa nënvizon se rruga drejt mbylljes së tyre deri në fund të vitit 2027 do të varet nga zbatimi real i reformave në shtetin e së drejtës, luftën kundër korrupsionit, funksionimin e institucioneve demokratike, lirinë e medias dhe reformat socio-ekonomike.
Raporti nënvizon se Shqipëria ka shënuar përparim të dukshëm në procesin e anëtarësimit, duke hapur grup-kapitujt brenda një periudhe relativisht të shkurtër. Eurodeputetët mirëpresin angazhimin politik për të ecur përpara me reformat dhe për të përmbushur kriteret e kërkuara.
Objektivi i përmendur për mbylljen e negociatave deri në fund të vitit 2027 konsiderohet ambicioz, por i arritshëm vetëm nëse reformat zbatohen plotësisht dhe jo vetëm në nivel formal.
Shqetësuese presioni politik ndaj sistemit gjyqësor
Një nga kapitujt më të rëndësishëm të raportit mbetet sundimi i ligjit. Draft-raporti vlerëson përfundimin e procesit të vetingut dhe funksionalizimin e institucioneve të reja të drejtësisë si hapa thelbësorë.
Në veçanti, përmendet roli i (SPAK) në hetimin e korrupsionit në nivele të larta. Megjithatë, raporti shpreh shqetësim për pretendimet mbi presionin politik ndaj sistemit gjyqësor dhe për nevojën e garantimit të pavarësisë së plotë institucionale.
Eurodeputetët theksojnë se qëndrueshmëria e reformës në drejtësi do të matet nga rezultatet konkrete dhe nga mbrojtja e institucioneve nga ndërhyrjet politike.
Korrupsioni, shqetësim serioz
Raporti përshëndet rastet e ndjekjeve penale dhe dënimeve për zyrtarë të lartë, duke i konsideruar ato sinjal pozitiv për funksionimin e sistemit të ri të drejtësisë.
Megjithatë, theksohet se korrupsioni mbetet një problem strukturor dhe se duhet forcim i mëtejshëm i mekanizmave të kontrollit dhe transparencës.
Partitë të zbatojnë rekomandimet e ODIHR-it
Sa i përket procesit zgjedhor, draft-raporti vlerëson se kuadri ligjor ekzistues lejon zhvillimin e zgjedhjeve konkurruese. Megjithatë, nënvizohet nevoja për përmirësim të barazisë në garë, shmangien e përdorimit të burimeve shtetërore për qëllime elektorale dhe garantimin e një klime politike më pak të polarizuar.
Në këtë drejtim, i bëhet thirrje mazhorancës dhe opozitës që të ndërmarrin një reformë zgjedhore gjithëpërfshirëse dhe të zbatojnë plotësisht rekomandimet e OSBE/ODIHR dhe Komisionit të Venecias përpara proceseve të ardhshme zgjedhore.
Raporti kërkon dialog më konstruktiv mes forcave politike dhe forcim të besimit të qytetarëve në proceset demokratike.
Ky draft-raporti i Parlamentit Europian jep një mesazh të qartë: Shqipëria ka bërë hapa përpara në rrugën drejt BE-së, por thelbi i procesit mbetet zbatimi real dhe i qëndrueshëm i reformave.
Integrimi europian nuk do të varet vetëm nga hapja e kapitujve, por nga konsolidimi i shtetit ligjor, garantimi i pavarësisë së drejtësisë dhe forcimi i demokracisë funksionale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje