.png)
Gazeta Si – Më 30 qershor në orën 10:00 do të mbahet seanca e parë në themel për dosjen e privatizimit të ish-kompleksit sportiv “Partizani”, për të cilën janë marrë të pandehur kryedemokrati Sali Berisha, dhëndri i tij Jamarbër Malltezi dhe 3 të tjerë.
Dosja kaloi për gjykim më 19 maj të këtij viti. Shorti përcaktoi se do të jetë gjyqtarja e posaçme Elsa Ulliri ajo që do të shpallë vendimin përfundimtar për fatin e kryetarit të Partisë Demokratike dhe të dhëndrit të tij, Jamarbër Malltezi.
Ndërsa gjyqtarët Bib Ndreca dhe Rudina Palloi janë dy anëtarët e trupës gjykuese. Më herët, avokatët e Berishës kishin kërkuar përjashtimin e gjyqtares Flojera Davidhi, e cila kaloi për gjykim dosjen.
Avokati i Berishës, Genc Gjokutaj ka bërë me dije për mediat se nuk do të kërkohet gjykim i shkurtuar për kreun e PD dhe se do të përballen me të gjitha pretendimet e SPAK lidhur me akuzën për “korrupsion pasiv”.
Dhëndri i Berishës, Jamarbër Malltezi akuzohet se ka kryer veprat penale “korrupsion aktiv” dhe “pastrim parash”
Fatmir Bektashi, ndërtuesi akuzohet për kryerjen e veprave penale të “Korrupsionit aktiv të funksionarëve të lartë shtetërorë”, parashikuar nga neni 245 i Kodit Penal dhe ‘pastrim parash’
Xhimi Begeja- Ortaku i Malltezit, trashëgimtar i tokës dhe bashkëpronar i ‘Homeplan’ akuzohet për ‘Pastrim Parash’
Andia Pustina- Financierja që kryente të gjitha operacionet financiare dhe ligjore të Homeplan sh.p.k – Akuzohet për ‘Pastrim Parash’.
SPAK e akuzon Berishën se gjatë kohës që ishte Kryeministër, ka përdorur funksionin e tij për të favorizuar dhëndrin Jamarbër Malltezi, në procesin e privatizimit të ish-kompleksit “Partizani”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
