.png)
Nga Gazeta Si – Ducati konfirmoi se ylli i “World Superbike”, Nicolo Bulega, do të zëvendësojë Marc Marquez për pjesën e mbetur të sezonit në “MotoGP”.
Kampioni aktual i “MotoGP” është jashtë garave që nga Indonezia, në fillim të Tetorit, kur pësoi një frakturë në shpatull.
Menjëherë pas kësaj u njoftua se ai do të mungonte për pjesën tjetër të sezonit.
Në dy garat e zhvilluara në Australi dhe Malajzi — Marquez u zëvendësua nga Michele Pirro (piloti testues i Ducati-t) që nuk mori asnjë pikë.
Prej kohësh kishte zëra se Bulega mund të transferohej në “MotoGP”, por ai fillimisht dëshironte të testonte motorin “GP25”.
Gjë që e bëri të enjten e kaluar në Jerez, dhe pas testeve konfirmoi se është gati për sfidën.
Në moshën 26-vjeçare, Bulega do të garojë në dy garat e fundit të këtij viti, në Portugali dhe Valencia, debutimi i tij në “MotoGP”.
Ai kaloi në “Supersport” në vitin 2022 pas tre sezonesh në “Moto2”, dhe ka qenë pjesë e Ducati-t që nga ai vit.
Bulega dominoi kampionatin “Supersport 2023”, përpara se të kalonte në “World Superbike” për vitin 2024.
Ai do të jetë shok skuadre me Francesco Bagnaia-n në ekipin zyrtar të Ducati-t për garat e fundit të këtij sezoni.
Në vitin 2026, ai do të vazhdojë si pilot testues i Ducati-t në “MotoGP”, së bashku me Pirro-n, dhe kjo mund të jetë një përgatitje për një vend të përhershëm deri në vitin 2027.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
