.png)
Donatella Versace, stilistja e famshme italiane, ka njoftuar se do të largohet nga roli i saj si drejtoreshë kreative e Versace. Pas afro 30 vitesh në krye të kësaj perandorie luksoze të modës, ajo e ka vendosur veten si një nga stilistet më të njohura në botë, duke grumbulluar një pasuri të madhe. Por sa është vlera e saj neto?
Sipas burimeve publike, pasuria neto e Donatella Versace vlerësohej të ishte 400 milionë dollarë në vitin 2024. Ajo aktualisht zotëron një rezidencë prej 15,000 metrash katrorë në Meina, Itali, me vlerë 5 milionë euro. Rezidenca përmban katër kate me pamje nga liqeni Maggiore, duke përfshirë 50 dhoma, 20 dhoma gjumi dhe 12 banja.
Pas vrasjes së Gianni Versace, themeluesi i markës, vajza e Donatella, Allegra, trashëgoi 50% të perandorisë Versace. Donatella mori 20%, ndërsa vëllai i saj Santo trashëgoi 30%.
Versace është një nga markat më prestigjioze dhe më të admiruara në mbarë botën, e njohur për dizajnet e saj inovative, cilësinë e lartë, elegancën dhe origjinalitetin. Gjatë viteve, shumë të famshëm dhe figura publike kanë veshur krijimet e saj, gjë që ka kontribuar në rritjen e vazhdueshme të pasurisë së Donatella Versace.
Pse u largua Donatella Versace?
Donatella mori kontrollin e shtëpisë ikonike të modës pas vrasjes tragjike të vëllait të saj dhe themeluesit të kompanisë, Gianni Versace, i cili u qëllua jashtë rezidencës së tij në Miami Beach në vitin 1997. Që atëherë, ajo ka ndihmuar në forcimin e reputacionit global të markës, pjesërisht për shkak të marrëdhënieve të saj të ngushta me personazhe të famshëm. Megjithatë, ka ardhur koha që ajo të vazhdojë.
“Ka qenë nderi më i madh i jetës sime të vazhdoj trashëgiminë e vëllait tim Gianni. Ai ishte një gjeni i vërtetë dhe shpresoj të trashëgoj pak nga shpirti dhe këmbëngulja e tij”, shkroi stilistja 69-vjeçare në llogarinë e saj në Instagram.
Ky vendim erdhi pas negociatave me Prada për blerjen e Versace, i cili pritet të shitet për afro 1.6 miliardë dollarë. Versace ka raportuar vështirësi financiare në muajt e fundit, duke treguar një rënie prej 6.6% në të ardhurat e saj dhe shitjet pritet të vazhdojnë të ulen gjatë gjithë vitit 2025.
Edhe pse Donatella po largohet nga drejtimi i kompanisë që themeloi vëllai i saj, ajo nuk do të distancohet plotësisht nga biznesi familjar, pasi ka deklaruar se tani do të shërbejë si Kryeambasadore e Markës.
Kush do të jetë drejtori i ri kreativ i Versace?
Pas largimit të Donatellës, Vitale, ish-drejtori i dizajnit dhe imazhit në Miu Miu, një kompani në pronësi të grupit Prada, do të marrë rolin e drejtorit kreativ duke filluar nga 1 prilli i këtij viti.
Kush është Donatella Versace?
Donatella Versace ka lindur më 2 maj 1955, në Itali. Nëna e saj, Françeska, ishte rrobaqepëse dhe babai i saj, Antonio, punonte si shitës. Ajo u rrit me dy vëllezërit e motrën e saj më të mëdhenj: Gianni, Santo dhe Tina, kjo e fundit ndërroi jetë në moshën 12-vjeçare për shkak të një infeksioni. Gjatë rinisë së saj, Donatella studioi gjuhë të huaja, ndërsa ndihmonte vëllain e saj Gianni me biznesin e tij të modës.
Me kalimin e kohës, Donatella u përfshi në mënyrë aktive në biznesin familjar dhe u emërua nënkryetare e kompanisë. Pas vdekjes tragjike të Gianni në 1997, ajo mori kontrollin e perandorisë Versace.
Në vitin 1983, Donatella u martua me Paul Beck, me të cilin pati dy fëmijë: Allegra Versace, e lindur në vitin 1986 dhe Daniel, i lindur në vitin 1989. Çifti u divorcua në vitin 2000. Më vonë, në vitin 2004, Donatella u martua me Manuel Dallorin, por kjo martesë zgjati vetëm një vit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
