.png)
Kandidati republikan për president të SHBA-së, Donald Trump u takua me kryeministrin izraelit Benjamin Netanyahu në Florida dhe sulmoi ashpër rivalen e tij politike, Kamala Harris.
“Unë në fakt nuk e di se si një person që është hebre mund të votojë për të, por kjo varet nga ata”, tha Trump për Harris, kundërshtaren e tij të mundshme në garën presidenciale 2024, pas takimit me Netanyahun.
Trump i quajti komentet e Harris që ajo bëri pas takimit me Netanyahun të enjten si “fyese”.
Netanyahu aktualisht po viziton SHBA-në dhe është takuar me presidentin amerikan Joe Biden dhe zëvendësen e tij Harris, pas një fjalimi në Kongres.
Të dy demokratët i bënë thirrje kryeministrit izraelit të bëjë më shumë për të mbrojtur popullsinë civile në Gaza.
Ata gjithashtu i kërkuan atij që të binte dakord për një marrëveshje armëpushimi për të lehtësuar lirimin e pengjeve të mbetura të mbajtura nga grupi ekstremist palestinez Hamas.
Harris tha më pas se ajo kishte shprehur “shqetësimin e saj serioz” për shkallën e vuajtjes njerëzore në Gaza, në bisedën e saj me Netanyahun.
“Ne nuk mund të shikojmë larg përballë këtyre tragjedive. Nuk mund ta lejojmë veten të mpihemi ndaj vuajtjeve dhe unë nuk do të hesht”, tha Harris.
Trump e siguron Netanyahun për solidaritetin e tij.
Takimi mes Netanyahut dhe Trump ishte takimi i parë kokë më kokë midis dy zyrtarëve, që kur Trump u largua nga Shtëpia e Bardhë më shumë se tre vjet më parë.
Sipas raportimeve të mediave, takimi ishte kërkuar nga lideri izraelit.
”Republikani e siguroi Netanyahun për solidaritetin e tij të plotë gjatë takimit”, tha ekipi i Trump.
Ish-presidenti i tha Netanyahut se do të bënte gjithçka që ishte në fuqinë e tij për të promovuar paqen në Lindjen e Mesme dhe për të luftuar antisemitizmin në universitetet amerikane nëse ai rizgjidhej.
Sipas raporteve, Netanyahu vlerësoi shërbimet e Trump ndaj Izraelit gjatë mandatit të tij nga viti 2017 deri në vitin 2021.
Trump është kandidati republikan presidencial i SHBA-së dhe shpreson të rimarrë Shtëpinë e Bardhë në zgjedhjet në fillim të nëntorit.
Pritja e Netanyahut në rezidencën luksoze të Trump në Mar-a-Lago vjen, ndërsa fushata zgjedhore në SHBA po i afrohet shtrirjes në të gjithë vendin
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
