.png)
Dinamo do të drejtohet tani e tutje nga katër aksionerë, me në krye Ardian Bardhin, i cili tashmë ka marrë shumicën e aksioneve dhe është zgjedhur president i skuadrës. Ashtu siç Gazeta Si paralajmëroi një ditë më parë, italianit Marko Pontreli i janë bashkuar 3 ortakë, biznesmenët Ardian Bardhi, Gurten Papuli dhe Olger Prifti. Lajmi është publikuar edhe në faqen zyrtare të klubi dinamovit në Facebook.
Dinamo është shumë pranë kthimit në Superiore dhe me ndryshimet e reja në krye të saj, sigurisht që e ardhmja do të jetë më e mirë. Biznesmeni Ardian Bardhi njihet në botën e futbollit, sepse ka qenë pjesë e Teutës në rolin e zëvendëspresidentit. Dy biznesmenët e tjerë, Papuli dhe Prifti, kanë përvojën e parë në futboll dhe kanë zgjedhur t’i bashkohen projektit të skuadrës kryeqytetase.
Klubi blu i mungon elitës së futbollit shqiptar prej 9 vjetësh dhe sidomos vitet e fundit, pasi iu mor edhe kompleksi stërvitor, ka vuajtur jo pak në inferiore. Me marrjen e presidencës nga Marko Pontreli situata ndryshoi dhe skuadra u bë pretendente serioze për kthimin në Superiore, por edhe më e suksesshme parashikohet të jetë e ardhmja me projektin e ri.
Rikthimi i Dinamos në elitë do të ishte një vlerë e shtuar për të, pasi bëhet fjalë për klubin e dytë më të titullar në vend, me 18 tituj kampionë. Pikërisht nga shkolla blu kanë dalë shumë emra të spikatur të futbollit tonë kombëtar, me në krye Sulejman Demollarin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
