Dieta mesdhetare ndihmon në problemet me mishrat e dhëmbëve

Dieta mesdhetare është e njohur për përfitimet e saj shëndetësore, duke ulur rrezikun nga sëmundjet e zemrës deri te disa lloje kanceri, dhe tani, një studim i ri ka një tjetër avantazh në listë: shëndet më të mirë të mishrave të dhëmbëve.

Dhëmbët dhe mishrat e dhëmbëve tanë kanë një ndikim të madh në shëndetin tonë të përgjithshëm. Sëmundja e mishrave të dhëmbëve, e njohur edhe si sëmundje periodontale, është lidhur me inflamacionin kronik, sëmundjet e zemrës, diabetin, kancerin, lindjen e parakohshme dhe peshën e ulët në lindje.

Studiuesit zbuluan se britanikët që nuk ndiqnin dietën mesdhetare kishin tendencë të kishin sëmundje më të rënda të mishrave të dhëmbëve, veçanërisht nëse hanin shumë mish të kuq. Ata gjithashtu kishin nivele më të larta të proteinave të lidhura me inflamacionin.

Ndërkohë, njerëzit, që zakonet e të ngrënit të të cilëve ngjanin shumë me dietën mesdhetare, të pasura me lëndë ushqyese dhe perime, fruta, bishtajore dhe vaj ulliri kishin nivele më të ulëta të këtyre problemeve inflamatore.

“Gjetjet tona sugjerojnë që një dietë e ekuilibruar, e tipit mesdhetar, mund të zvogëlojë potencialisht sëmundjen e mishrave të dhëmbëve dhe inflamacionin sistemik”, tha në një deklaratë Giuseppe Mainas, një nga autorët e studimit.

Studimi, i cili u botua në Journal of Periodontology, përfshiu 195 pacientë në Mbretërinë e Bashkuar. Ata iu nënshtruan ekzaminimeve dentare, iu morën mostra gjaku dhe u anketuan në lidhje me dietat e tyre.

Dieta mesdhetare është e njohur për vetitë e saj anti-inflamatore, të cilat mund të ndihmojnë në shpjegimin pse duket se luan një rol në shëndetin oral, thanë studiuesit.

Rreth një miliard njerëz në të gjithë botën preken nga sëmundja e mishrave të dhëmbëve, me higjienën e dobët orale dhe përdorimin e duhanit si faktorët kryesorë të rrezikut, sipas Organizatës Botërore të Shëndetësisë (OBSH).

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.