.png)
Nga Gazeta ‘SI’- Irani po shqyrton mundësinë e mbylljes së Ngushticës së Hormuzit, tha një komandant i Gardës Revolucionare për mediat lokale në një intervistë, ndërsa luftimet vazhdojnë në ditën e dytë të konfliktit
Sardar Esmail Kowsari tha se mbyllja e Ngushticës së Hormuzit “është duke u shqyrtuar dhe Irani do të marrë vendimin më të mirë me vendosmëri”.
Ngushtica e Hormuzit, që ndodhet mes Omanit dhe Iranit, është rruga më e rëndësishme në botë për transportin e naftës.
Edhe vetëm përmendja e mundësisë për mbylljen e saj ka shkaktuar tronditje në tregjet globale, duke sjellë rritje të çmimit të naftës.
“Izraeli është përmbajtur nga goditja në mënyrë të rëndë e infrastrukturës së naftës së Iranit. Nëse kjo ndryshon, pasojat do të jenë shumë më dramatike”, tha për Al Jazeera analisti i pavarur i çështjeve gjeopolitike, Taufiq Rahim.
Më shumë se 24 orë pas sulmit fillestar të Izraelit ndaj objektivave iraniane që vrau tre komandantë ushtarakë iranianë, Forcat e Mbrojtjes së Izraelit (IDF) po vazhdojnë sulmet ajrore ndaj objektivave në Iran të shtunën.
“[Forcat Ajrore Izraelite] vazhdojnë të godasin objektiva për të larguar kërcënimet në Iran”, postoi IDF në Telegram të shtunën në mëngjes së bashku me pamjet e sulmeve ajrore.
Zhvillimi pasoi nisjen nga Irani të një vale sulmesh hakmarrëse me raketa në Izrael gjatë natës dhe deri në mëngjesin e së shtunës në përgjigje të sulmeve të Izraelit ndaj objekteve të tij bërthamore dhe vendeve të raketave.
Sulmet hakmarrëse nga Irani kanë vrarë tre persona dhe kanë plagosur dhjetëra të tjerë në Izrael, ndërsa ambasadori i Iranit në OKB tha se 78 persona u vranë në sulmet izraelite ndaj Iranit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
