.png)
Disiplina vendosi të enjten për përjashtimin e Shkumbinit nga Kategoria e Parë dhe zbritjen e tij në Kategorinë e Dytë, për shkak të dhunës së ushtruar në stadiumin e Peqinit gjatë ndeshjes me Dinamon. Një dënim maksimal për klubin peqinas. Sigurisht që një dënim të ashpër do të kishte, sepse Shkumbini dështoi në masat organizative, tifozët u futën në fushë pas ndeshjes dhe sulmuan arbitrin Sokol Bebja, pavarësisht se ndërhyrja ishte e shpejta nga forcat e rendit. Por syrgjynosja e Shkumbinit një kategori më poshtë, duket një dënim paksa ekstrem.
Argumenti i vendimit të Disiplinës është se ka pasur kërcënim të arbitrave jo vetëm pas, por edhe gjatë ndeshjes. Delegati i FSHF-së, Millan Baçi, duket se ka raportuar me shumë hollësi gjithçka ndodhi në ndeshjen Shkumbini-Dinamo. Këtë herë, përfaqësuesi i FSHF-së nuk ka “mbyllur njërin sy”, siç ndodh rëndom në futbollin tonë të kategorive inferiore, ku monitorimi është më i paktë. Për hir të së vërtetës, ajo që ndodhi në Peqin e çonte “ujin” direkt në “mullirin” e FSHF-së, kështu që zyrtari i saj nuk kishte pse të kursehej. Po ashtu edhe Komisioni i Disiplinës.
Shkumbini është një klub opozitar me FSHF-në, kjo dihet publikisht. Është një nga klubet që në zgjedhjet e fundit për kreun e FSHF-së doli hapur kundër presidentit aktual, Armand Duka. Peqinasit e kanë vuajtur jo pak “bindjen e tyre politike”, këtë sezon me vështirësi ishin ngjitur nga Kategoria e Dytë dhe tani, pas 11 javësh kampionat në Kategorinë e Parë, e shohin veten sërish aty. Kjo do të thotë se vuajtjet do të shtohen dhe vështirë se futbolli në Peqin do ta marrë veten shpejt. Drejtuesit e klubit kanë pohuar se do ta apelojnë vendimin, pasi e quajnë një dënim komunist dhe të pabazuar në rregullore, por e vërteta është se kanë pak shanse të ndryshojnë diçka.
Absolutisht, masat ndaj dhunës në futboll duhet të jenë drastike, por po ashtu të githë duhet të trajtohen si të barabartë dhe rregullorja të zbatohet për të gjithë njësoj. Ky është vetë kuptimi i garës në sport. Në rastin e Shkumbinit u duk sikur mezi pritej të ndodhte diçka për të dhënë një dënim maksimal. Vetë situata të lë të kuptosh se ky vendim është marrë edhe për shkak të “bindjeve politike” të peqinasve. U dënua edhe Kamza sezonin që shkoi, por dhuna ishte shumëfish më e madhe dhe barbare, për më tepër e ushtruar nga drejtuesit e kësaj skuadre. Në Peqin dhuna u lokalizua shpejt, ndoshta aq shpejt sa për të shmangur zbritjen një kategori më poshtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
