Gazeta Si – Do të duhet pak kohë deri në dhënien e një ndëshkimi të mundshëm për skuadrën që po dominon Botërorin në Formula 1. Red Bulli-i, që ka shkelur rregullat e limitit të kostove, ashtu si Aston Martin, po bëhet gati për t’u përballur me FIA-n për çdo rast.
Ferrari dhe Mercedesi presin dorën e ashpër të FIA-s për këtë rast, ndërsa Red Bull-i po përdor një taktikë agresive për këtë situatë. Komunikata me të cilën kjo skuadër reagoi pas hetimit që konfirmoi shkeljet, tregon qartë etapat që do të ndiqen.
“Kemi mësuar rezultatin e hetimit të FIA-s për shkeljen e rregullores financiare dhe jemi shumë të zhgënjyer. Të dhënat tona për 2021-shin ishin poshtë limitit të ‘budget cap’ dhe duhet të shohim me kujdes rezultatet e FIA-s.
Bindja jonë është se kostot janë brenda rregullores. Pavarësisht reagimeve dhe qëndrimeve të të tjerëve, ka një proces të përcaktuar nga FIA që po e respektojmë, duke marrë në konsideratë të gjitha opsionet në dispozicionin tonë”, – shkruhet në komunikatë.
Toni i përdorur në këtë reagim nga skuadra që sapo ka fituar Botërorin me Maks Vershtapen, tregon qartë linjën e fortë mbrojtëse të saj.
Skuadrat që kanë bërë shkelje do të përballen me një proces në gjykatën e FIA-s, të përbërë minimumi nga 6 gjykatës dhe maksimumi 12. Nëse skuadrat shpallen fajtore, kanë të drejtën e apelimit në Gjykatën Ndërkombëtare të vetë FIA-s.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
