.png)
Gazeta Si – Dënim shumë i rëndë për Simona Halep. Ish-numri 1 në botë është skualifikuar për 4 vjet, pasi ka rezultuar pozitive në testet e dopingut të një viti më parë. Rumunia ka pretenduar gjithmonë se është e pafajshme, por tani vjen ky vendim, që rrezikon vërtet t’i mbyllë karrierën 32-vjeçares.
Skualifikimi llogaritet prej 7 tetorit të vitit të kaluar dhe përfundon në të njëtën datë të vitit 2026. Halep është dënuar për përdorim të ‘Roxadustat’, substancë e zbuluar në shtator të 2022-shit, pas humbjes në turin e parë të Us Open ndaj Daria Snigur.
Bëhet fjalë për një ilaç që përdoret për trajtimin e anemisë, por që është i ndaluar fushën sportive, sepse shton prodhimin e eritropoietinës dhe rrit hemoglobinën. Në fakt jemi ende në fillim të një beteje ligjore, që pritet të jetë e gjatë. Tenistja rumune do të apelojë. Dënimi i saj duket vërtet shumë i rëndë.
Gjykata e pavarur e ‘International Tennis Integrity Association’ është mbledhur në Londër dhe ka dëgjuar versionet e ekspertëve shkencorë të thirrur nga Halep, si dhe sportisten vetë që ka dhënë informacion të detajuar. Por nuk ka mjaftuar.
Gjykata e ka shpallur ish-numrin 1 fajtore, pasi ka shkelur rregullat antidoping në dy pika të kodit: praninë e ‘Roxadustat’ në analizat e urinës, por mbi të gjitha është konfirmuar përdorimi i një substance të ndaluar edhe sa i takon programit në pasaportën biologjike të sportistes me 51 kampione gjaku.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
