.png)
Nga Gazeta ‘Si’- Një grup deputetësh socialistë kanë kërkuar përjashtimin e kreut të Partisë Demokratike, Sali Berisha deri në dy muaj nga punimet e Kuvendit, pasi ata pretendojnë se ka ofenduar ambasadorin e Bashkimit Europian, Silvio Gonzato.
Në kërkesën drejtuar Sekretariatit të Etikës, PS argumenton se deklaratat e Berishës ishin fyese, denigruese dhe diskriminuese.
Në shkresën e socialistëve thuhet ndër të tjera se është cenuar jo vetëm dinjiteti personal i përfaqësuesit diplomatik, por edhe imazhi institucional i Kuvendit të Shqipërisë.
Kujtojmë se dje, u debatua mbi 12 orë në Kuvend, veçanërisht për Projektligjin e Barazisë Gjinore, i cili u miratua me 77 votat e mazhorancës.
Berisha e kundërshtoi ashpër këtë ligj, duke thënë me bindje se “godet familjen” dhe “se nuk ka lidhje me direktivat e Bashkimit Europian”.
Nisur nga këto argumente, ai i bëri thirrje nga foltorja ambasadorit Gonzato, të shpjegonte se ku janë marrë ato direktiva si bazë për ndryshimet në atë ligj.
Deklarata e tij solli edhe reagimin e Komisioneres së BE për Zgjerim, Marta Kos, e cila tha se linjëzimi i legjislativit të Shqipërisë me këto parime të BE, është pjesë e procesit të pranimit në Union.
U pasua më pas edhe me reagimin e kryeministrit Edi Rama, i cili kërkoi ndjesë për sjelljen e kundërshtarit të tij dhe përdorimin e emrit të ambasadorit për një qëllim të ulët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
