Deklarata e papritur, SHBA: Do të vazhdojë Biden garën apo jo?

Pas performancës së tij shkatërrimtare në debatin televiziv javën e kaluar, presidenti Biden me sa duket për herë të parë ka folur me një të besuar për mundësinë e tërheqjes. Sipas informacioneve të New York Times, Joe Biden ka thënë, ai ndoshta nuk do të mund ta shpëtojë kandidaturën e tij, nëse ditët e ardhshme nuk do të arrijë ta bindë opinionin, se është i aftë të përballojë postin.

I besuari i Bidenit, i cili nuk dëshironte t'i përmendet emri, ka thënë: "Ai e di, se nëse ka edhe dy paraqitje të tjera si kjo e fundit, ne do të jemi ndryshe në fundin e fundjavës"

Biseda me të besuarin është sinjali i parë, që presidenti mendon seriozisht për nëse do të jetë në gjendje ta marrë veten pas paraqitjes katastrofale në duelin televiziv me sfidantin Donald Trump.

Dyshim në kandidaturë? Shtëpia e Bardhë përgënjeshtron

Shtëpia e Bardhë ka reaguar menjëherë duke e hedhur poshtë si "absolut gabim" dhe pak më vonë citoi edhe Bidenin me fjalët, se: ‘”Jam drejtues i partisë demokrate”. Askush nuk më zhvendos". Zëdhënësit qeveritarë përpiqen prej ditësh të minimizojnë dëmin duke i relativizuar dyshimet mbi aftësinë e Bidenit për të përballuar presidencën.

Presioni ndaj Bidenit po shtohet dhe gjithnjë e më shumë po shprehen dyshime lidhur me shanset e kandidaturës së tij.

Për herë të parë një demokrat kërkoi publikisht dorëheqjen e Bidenit. Kongresmeni Lloyd Doggett nga Teksasi tha, se po rrezikojmë seriozisht, që qeverinë ta marrë një bandë kriminelësh. Ai tha, se i heq kapelen presidentit Biden, po kam ndjesinë, që po vjen koha që ai të tërhiqet. Ende asnjë demokrat me emër nuk është shprehur publikisht, por presioni ndaj Bidenit po rritet ndjeshëm.

New York Times citon në një artikull tjetër pa përmendur me emër një tjetër punonjës të presidencës, i cili tregon për një sërë situatash nga javët e muajt e kaluar, në të cilat presidenti Biden duket i dobët, i papërqendruar, e ndonjëherë si i mpirë. Vëzhguesit politik po presin tani sondazhet, që mund të japin qartësi se sa do të jenë kuotat e pranimit në popull në SHBA për Bidenin president. Nëse rezultatet – veçanërisht në shtetet e rëndësishme swing – do të jenë ekstremisht negative, mund të ndryshojë qëndrimi tek demokratët.

Qysh tani po debatohet në radhët e demokratëve, nëse do të duhet ta këmbejnë kandidatin 81 vjeçar me një tjetër kandidat. Kjo do të ishte e mundur, por edhe shumë e ndërlikuar.

Kush mund ta zëvendësojë Bidenin?

Aspirantë për presidencën ka mjaft. P.sh. diskutohet për guvernatorin e Kalifornisë dhe të Miçiganit, Gavin Newsom dhe Gretchen Whitmer. Edhe JB Pritzker, guvernatori i Illinoisit është një opsion. Që të tre ndërkohë nuk i kanë nxjerrë në pah ambiciet e tyre. Por vazhdimisht lakohet edhe emri i zëvendëspresidentes Kamala Harris. Disa demokratë me influencë mendojnë, se 59 vjeçarja nuk mund të anashkalohet në asnjë mënyrë në kërkimin e një kandidati të ri. Emërimi i saj si kandidate do të kishte avantazhe të shumta. Jo vetëm se ajo mund të marrë të gjithë shumën e donacioneve, që ka mbledhur ndërkohë Biden gjatë fushatës, por ajo mund të përdorë edhe të gjithë infrastrukturën elektorale. Emri i saj është më i njohuri ndër zgjedhësit, e tek e fundit më 2020 ajo ka bërë fushatë bashkë me Bidenin.

Por kundër Kamala Harris deri tani flasin kuotat e dobëta në sondazhe, shumë më poshtë se ato të Bidenit. Kjo mund të ndryshojë nëse Biden tërhiqet nga kandidatura. Ndërkohë Biden do të vazhdojë paraqitjet në veprimtaritë elektorale të planifikuara. Ai disa herë ka deklaruar deri më sot, se nuk do të tërhiqet. Gjatë javës ai do të vazhdojë konsultat me kongresmenët. Ditët e ardhshme ai do të ketë paraqitje në fushatat elektorale në Wisconsin dhe Pensilvani. Javën e ardhshme në samitin e NATO-s në Uashington, Biden do të mbajë një konferencë shtypi.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.