.png)
Gazeta Si – Qyteti amerikan i shkretëtirës Roswell ka qenë një parajsë për ata që besojnë te jashtëtokësorët për dekada të tëra.
Pasi një objekt i shndritshëm u rrëzua në një fermë në qytet në vitin 1947, disa media lokale, duke cituar një njoftim për shtyp, raportuan se ushtria kishte gjetur një “disk fluturues”.
Më pak se një ditë më vonë, Fusha Ajrore e Ushtrisë Roswell e tërhoqi komunikatën, e ndjekur nga një korrigjim. Ushtria pretendoi se ishte një tullumbace meteorologjike.
Së bashku me krijimin e bazës sekrete ushtarake “Zona 51”, incidenti formoi bazën për një teori konspirative të vazhdueshme rreth ekzistencës së alienëve.
Sidomos pas vitit 1989, kur amerikani Bob Lazar pretendoi se kishte punuar në teknologjinë aliene në bazë, “Zona 51” fitoi një status mitik midis besimtarëve “marsianë”.
Në një podcast të drejtuar nga Brian Tyler Cohen, ish-presidenti i SHBA-ve, Barack Obama u pyet rreth ekzistencës së alienëve. “A janë alienët të vërtetë?” e pyeti Cohen Obamën. “Ata ekzistojnë, por unë nuk i kam parë kurrë”, – u përgjigj ish-presidenti.
“Ata nuk po qëndrojnë brenda, si quhet përsëri?”, – vazhdoi Obama. “Zona 51?”, – shtoi Cohen, të cilës Obama iu përgjigj pozitivisht.
“Nuk ka asnjë strukturë nëntokësore, përveç nëse ka ndonjë konspiracion masiv që ata (shërbimet e inteligjencës) po ia fshihnin presidentit të Shteteve të Bashkuara”.
“Cila ishte pyetja e parë që dëshironit të merrnit përgjigje si president?”, pyeti Cohen më pas. “Ku janë alienët?”, – tha Obama, duke qeshur.
Komentet e ish-presidentit u bënë shpejt virale. Pasi u publikua podkasti, Obama lëshoi një deklaratë: “Po përpiqesha të përgjigjesha në frymën e një pyetje-përgjigjeje të shpejtë, por meqenëse ka marrë vëmendje, dua të sqaroj”.
“Statistikisht, universi është aq i madh, sa shanset e ekzistencës së jetës janë të larta, – shkroi Obama. – Por distancat midis sistemeve diellore janë aq të mëdha, sa shanset që alienët të na vizitojnë janë të pakta dhe nuk kam parë asnjë provë që alienët të na kontaktojnë gjatë presidencës sime. Absolutisht!”.
Në vitin 2013, qeveria amerikane lëshoi një shpjegim për teoritë konspirative që rrethonin “Zonën 51”. Në dokumentet e deklasifikuara, CIA shkroi se baza ushtarake ishte përdorur më parë për të testuar teknologjinë ushtarake të klasifikuar, siç janë aeroplanët spiunë U-2 dhe një aeroplan spiun supersonik.
Ato fluturime-provë shpejt çuan në “efekte anësore të papritura”, shkroi CIA në dokumente: “Një rritje dramatike e raporteve të objekteve fluturuese të paidentifikuara”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
