.png)
Pirja e shumë gotave me çaj dhe kafe në ditë është lidhur me një rrezik më të ulët të goditjes në tru dhe demencës, sipas një studimi të ri. Hulumtimi i botuar në revistën “PLOS Medicine” ka treguar se ata që pinin dy deri në tre filxhanë kafe, ose tre deri në pesë filxhanë çaj mund të kenë një rrezik më të ulët të zhvillimit të një nga sëmundjet e lartpërmendura.
Rosa Sancho, kreu i studimeve në fondacionin “Alzheimer’s Research UK”, paralajmëroi se rreziku i demencës varet nga “ndërveprimi kompleks i moshës sonë, gjenetikës dhe stilit të jetesës”.
“Studimet si ky nuk janë në gjendje të përcaktojnë me saktësi shkakun dhe efektin, e ndërsa studiuesit u përpoqën të kontrollonin për faktorë të tjerë që mund të ndikojnë në rrezikun e një personi për goditje në tru dhe demencë vaskulare, nuk mund të nxirren përfundime të qëndrueshme nëse çaji ose kafeja shkaktojnë më pak rrezik”, tha ajo.
Sipas sak pjesëmarrësit raportuan vetëm konsumimin e çajit dhe kafesë në fillim të studimit dhe nuk ka të dhëna për zakonet afatgjata, kështu që ajo thotë se nuk është e qartë se sa të rëndësishme janë gjetjet për shëndetin afatgjatë të trurit.
“Ndërsa studimet e mëparshme kanë shqyrtuar lidhjet midis konsumit të çajit dhe kafesë dhe shëndetit më të mirë të trurit, ka pasur mospërputhje në gjetjet. Kërkimet e ardhshme me pjesëmarrës të një sërë moshash dhe etnish do të nevojiten për të kuptuar plotësisht se cilat lloje të demencës dhe goditjes në tru janë të lidhura me pirjen e çajit dhe kafesë,” thotë ekspertja.
Një goditje në tru është një gjendje mjekësore serioze kërcënuese për jetën që ndodh kur furnizimi me gjak në një pjesë të trurit ndërpritet. Ato shkaktohen më së shpeshti nga mpiksja e gjakut. Shenjat që tregojnë se dikush ka një goditje në tru mund të përfshijnë rënien e fytyrës, gojës ose të dyjave në njërën anë dhe të folurit të paqartë dhe dobësinë e gjymtyrëve. Ndërsa demenca nuk është një sëmundje e vetme, por një grup simptomash të shkaktuara nga dëmtimi i trurit. Shenjat e gjendjes mund të përfshijnë humbjen e kujtesës, të tilla si kujtimi i ngjarjeve të kaluara shumë më lehtë se ato të fundit, ose probleme me të menduarit ose arsyetimin, ose të keni të vështirë të ndiqni bisedat ose programet televizive.
Sipas fondacionit “Alzheimer’s Research UK”, njerëzit mbi 65 vjeç kanë shumë më tepër gjasa të preken nga demenca, por kjo mund të prekë edhe të rinjtë. Për studimin e tyre, kërkuesit studiuan gjithsej 365,682 pjesëmarrës, të moshës 50 deri në 74 vjeç.
Pjesëmarrësit vetë-raportuan zakonet e tyre të pirjes së çajit dhe kafesë në fillim të studimit. Hulumtuesit më pas regjistruan numrin e njerëzve që patën një goditje në tru (2.8 për qind) dhe ata që zhvilluam sëmundjen e Alzheimerit ose demencën vaskulare (1.4 për qind). Ata zbuluan se pirja e çajit dhe kafesë lidhej me një rrezik më të ulët për të pasur një goditje ishemike (të shkaktuar nga një enë gjaku e bllokuar) dhe çmenduri vaskulare, në vend të një goditjeje hemorragjike (të shkaktuar nga një shpërthim i enëve të gjakut) ose sëmundjes së Alzheimerit, por ekspertë të jashtëm shpjegojnë se këto të dhëna nuk janë të mjaftueshme.
Burimi:The Independent/Përshtati:Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje