Gazeta Si – Në Kinë, Komisioni Kombëtar i Shëndetësisë, i cili vepron si ministri, njoftoi pezullimin e publikimit të të dhënave ditore për rastet dhe vdekjet me Covid 19.
Nuk u dha asnjë shpjegim për vendimin. Për javë të tëra, statistikat nuk kanë pasqyruar më me besueshmëri valën e paprecedentë të infeksioneve që ka goditur vendin që nga braktisja më 7 dhjetor e masave të rrepta shëndetësore të politikës “Zero Covid”.
Me masat kufizuese në fuqi, testet pothuajse të detyrueshme PCR bënë të mundur ndjekjen e besueshme të ecurisë së epidemisë.
Tani, megjithatë, njerëzit e infektuar me virus testohen në shtëpi dhe rrallë i raportojnë rezultatet tek autoritetet.
Komisioni tha se Qendra Kineze për Kontrollin dhe Parandalimin e Sëmundjeve (CDC), do të lëshojë informacion në lidhje me shpërthimin për qëllime referimi dhe kërkimi, por nuk specifikoi llojin ose shpeshtësinë e të dhënave që do të publikohen.
Në fakt, situata pandemike në Kinë vazhdon të shqetësojë botën. Sipas “Financial Times”, e cila raporton një vlerësim të brendshëm nga zyrtarët më të lartë shëndetësorë të vendit, gati 250 milionë njerëz në vend mund të jenë infektuar me Covid në 20 ditët e para të dhjetorit.
Nëse është i saktë, vlerësimi do të përfaqësonte shpërthimin më të madh të Covid deri më sot në nivel global.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
