.png)
Çmimet botërore të ushqimeve u rritën për të katërtin muaj në radhë gjatë nëntorit për të qëndruar në nivelet më të larta të 10 viteve të fundit, të udhëhequr nga kërkesa e fortë për grurë dhe produkte qumështi, deklaroi agjencia e ushqimit e OKB-së. Indeksi i çmimeve të ushqimit të Organizatës së Ushqimit dhe Bujqësisë (FAO), që ndjek çmimet ndërkombëtare të mallrave ushqimore më të tregtuara në nivel global, ishte mesatarisht 134.4 pikë muajin e kaluar, krahasuar me 132.8 të rishikuar për tetorin.
Indeksi i çmimeve të drithërave i FAO u rrit me 3.1% në nëntor krahasuar me muajin paraardhës dhe ishte 23.2% më i lartë se niveli i tij i një viti më parë, me çmimet e grurit që arritën nivelin e tyre më të lartë që nga maji 2011. FAO deklaroi se çmimet e grurit u mbështetën nga shqetësimet për reshjet në Australi dhe pasiguria mbi ndryshimet e mundshme në masat e eksportit në Rusi.
Indeksi i çmimeve të qumështit shënoi rritjen më të madhe mujore, me 3.4% krahasuar me muajin e kaluar. “Kërkesa e fortë globale për importe vazhdoi për gjalpin dhe qumështin pluhur, ndërsa blerësit kërkuan të siguronin furnizime në vend në pritje të shtrëngimit të tregjeve”,- theksoi FAO.
Sipas agjencisë, çmimet globale të sheqerit u rritën me 1.4% në muaj dhe u rritën gati 40% në bazë vjetore. Indeksi i çmimeve të mishit shënoi rënien e tij të katërt mujore radhazi, duke rënë 0.9% në muaj, ndërsa çmimet botërore të vajit vegjetal ranë 0.3% në nivelet e tetorit, por çmimet ndërkombëtare të vajit të palmës mbetën të qëndrueshme, tha FAO.
Organizata me seli në Romë uli projeksionin e saj të prodhimit global të drithërave në 2021 në 2.791 miliardë ton, nga 2.793 miliardë e vlerësuar një muaj më parë, sipas parashikimit të ofertës dhe kërkesës për drithëra. Megjithatë, prodhimi i pritshëm botëror i drithërave do të ishte ende një rekord, shtoi FAO.
Burimi:Reuters/Gazeta "SI"
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
