Në pritje të kuptohet sesi do të zhvillohet çështja Messi, në kampin e Manchester City vazhdojnë të punojnë për të rregulluar mbrojtjen, thembrën e Akilit të skuadrës së Guardiolas sezonin e kaluar. Sipas “France Football”, është arritur akordi total me menaxherët e Kalidou Koulibaly: pagë e dyfishuar (nga 6 në 12 milionë euro) e administrim komplet i të drejtave të tij të imazhit. Anglezët, megjithatë, duhet ende të bindin Aurelio De Laurentiis, që kërkon 90 milionë, ndërsa oferta është e ndalur në 63.
Sirenat e Premier League për Koulibaly po bëhen gjithnjë e më insistuese. E nëse në vitet e fundit De Laurentiis ka guxuar të thotë jo, përballë ofertave të Chelsea e Manchester United, këtë herë 29 vjeçari senegalez mund të largohet vërtetë nga Napoli për të përqafuar Pep Guardiola. Akordi mes City e mbrojtësit është total, por tani topi është në duart e pronarit të Napolit që nuk duket se ka ndërmend të bëjë ulje: 90 milionë.
Një shifër që Citizens nuk janë absolutisht të gatshëm ta paguajnë. Pas Nathan Ake, Guardiola kërkon një tjetër qendror të besueshëm për ta bashkuar me Laporte, po pa bërë çmenduri. Merkato mbyllet në 5 tetor, por anglezët duan një përgjigje në harkun e 10 ditëve. Javën e ardhshme në Capri mund të jetë takimi vendimtar: ajo që parashikohet është se me 70-75 mund të mbyllet për lumturinë e të gjitha palëve të përfshira.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
