Çfarë parashikon plani i Zelenskit për të fituar luftën me Rusinë

Gazeta Si – “Ata nuk duan të flasin për këtë dhe unë vazhdoj ta përmend. Lojërat Olimpike kanë përfunduar, por pingpongu është ende atje”. Presidenti ukrainas bëri shaka një ditë më parë gjatë konferencës për shtyp të mbajtur në Kiev.

Gjatë takimit, Volodimir Zelenski njoftoi se do t’ia paraqesë planin e tij për “fitoren” presidentit Joe Biden dhe dy kandidatëve për Shtëpinë e Bardhë, Kamala Harris dhe Donald Trump, ndërsa ofensiva e Kievit në rajonin e Kurskut dhe sulmet e rënda raketore ruse vazhdojnë ndaj infrastrukturës energjetike të Ukrainës.

E përkthyer, Zelenski do t’i kërkojë aleatit të tij, SHBA-ve, të heqë linjat e kuqe të famshme që pengojnë Kievin të përdorë armë me rreze të gjatë në thellësi të territorit rus, në veçanti raketat “ATACMS” të prodhuara nga SHBA dhe raketat “Storm Shadow” të prodhuara nga Britania.

Për këtë arsye – zbulon faqja amerikane “Politico” – ministri i Mbrojtjes, Rustem Umerov dhe këshilltari i lartë i presidentit, Andriy Yermak, do të paraqesin një listë të objektivave me vlerë të lartë me rreze të gjatë për t’u goditur në Rusi. “Çështja kryesore është të detyrojmë Rusinë t’i japë fund luftës”, tha Zelenski.

“Ne me të vërtetë duam drejtësi për Ukrainën. Dhe nëse ky plan pranohet – dhe së dyti, nëse realizohet – besojmë se objektivi kryesor do të arrihet”. Por lideri i Kievit nuk shtoi detaje të tjera.

Nuk është ende e qartë se çfarë takimesh janë planifikuar në Uashington, por më parë liderët ukrainas diskutuan në kryeqytetin amerikan me këshilltarin e sigurisë kombëtare, Jake Sullivan dhe shefin e Pentagonit, Lloyd Austin.

Joe Biden ka reduktuar në mënyrë progresive kufizimet, por nuk dihet nëse ai do të bëjë një ndryshim të mëtejshëm shqetësues, pasi është për të shmangur një përshkallëzim të konfliktit dhe një konfrontim të drejtpërdrejtë me Moskën. Inkursioni i befasishëm në rajonin e Kurskut është gjithashtu një çështje reflektimi.

Shtetet e Bashkuara kanë thënë për muaj të tërë se heqja e ndalimeve për përdorimin e materialeve amerikane të luftës, nuk do të bënte një ndryshim strategjik, pasi Rusia ka zhvendosur shumicën e objektivave të mundshëm në një distancë të sigurt.

Administrata amerikane vlerëson gjithashtu se Ukraina nuk ka mjaftueshëm sisteme raketore taktike (ATMS), raketat me rreze të gjatë veprimi që dëshiron t’i përdorë për të goditur objektiva me vlerë të lartë në Rusi. Dhe furnizimet amerikane të këtyre raketave janë të kufizuara.

Zëdhënësi i Këshillit të Sigurisë Kombëtare, John Kirby përsëriti se “nuk ka ndryshime” në linjën e Shtëpisë së Bardhë, ndërsa saktësoi se “ne do të vazhdojmë bisedat me ukrainasit dhe do t’i mbajmë private”.

Natyrisht, “mbështetja e palëkundur” e SHBA-ve për Kievin mbetet, siç përsëritet edhe nga Biden, i cili ditët e fundit foli me Zelenskin, duke njoftuar një paketë të mëtejshme ndihme ushtarake prej 125 milionë dollarë.

Të dy udhëheqësit, të cilët do të takohen personalisht në Asamblenë e Përgjithshme të OKB-së në Nju Jork në fund të shtatorit, diskutuan kërkesën e Kievit për armë shtesë me rreze të gjatë, por jo heqjen e kufizimeve, sipas “Politico”-s.

Por disa deputetë dhe liderë ukrainas – si dhe një deputet demokrat amerikan – pretendojnë se disa anëtarë të administratës Biden po shqyrtojnë mundësinë e largimit të tyre në ditët në vijim.