Gazeta Si – Çelsi shpenzon shifra ta paimagjinueshme për një lojtar, duke vendosur rekorde, por në fushë vazhdon të dështojë. Uest Hemi e ka mundur 3-1 në derbin e Londrës, në javën e dytë të Premier Ligës. Telashe që në start për skuadrën e trajnerit Poçetino, me 1 pikë pas 2 ndeshjeve të para.
Në fushën e Uest Hemit Çelsi pësoi humbjen e parë në këtë kampionat. Pas 7 minutash, Uard-Proues shërbeu për Aguerd që zhbllokoi shifrat. Çukuemeka barazoi rezultatin për blutë e Londrës, që në fund të pjesës së parë kishin mundësinë më të mirë për golin e avantazhit. Souçek shkaktoi penallti, por Enco Fernandez dështoi nga pika e bardhë, i hipnotizuar nga Areola.
Në pjesën e dytë erdhi avantazhi i Uest Hemit me Mikail Antonio. Më pas, Aguerd u ndëshkua me kartonin e dytë të verdhë dhe la fushën në minutën e 68-të. Poçetino futi në fushë Madueke dhe Burstou, por golin e gjeti sërish Uest Hemi. Në shtesë Paketa mbylli llogaritë në 3-1 me penallti.
Vetëm pas 2 javësh, Çelsi është -5 pikë nga kreu i renditjes, ndërsa takimi me fitoren e parë është shtyrë sërish. Aston Vila mundi 4-0 Evertonin, duke regjistruar fitoren e parë në kampionat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
