Prej angazhimeve që kam, koha nuk më mjafton më aq sa të mund të shkruaj shpesh e për gjithçka që ngacmon të përditshmet e mia, ndaj mendimet, analizat… mbeten të pahedhura në word, ose thjesht të thëna në biseda me miq e kolegë. Ishin pikërisht këta të fundit që më bindën se duhet një blog që të më fusë në brazda, të më nxisë ta gjej kohën që të shkruaj. Nuk e di sa do të mund të krijoj një rutinë, të paktën javore, por një gjë është e sigurt: ky mund të quhet rikthimi im në median e shkruar.

Aty e kam nisur punën si gazetare, kur e shkruara ishte vetëm në print, në gazeta ditore e javore, e mandej edhe në revista. Fjala e shkruar do të mbetej arma ime më e fortë, si skenariste e autore në produksionet e ndryshme televizive si “Dancing with the Stars” në Vizion Plus e më pas “Big Brother Albania” dhe “The Voice of Albania” në Top Channel. Sprova e radhës është media online, ku deri më tash kam shkruar ndonjëherë në të rrallë, e ku premtoj se do të jem tashmë më e pranishme në këtë blog.