Nga Gazeta ‘Si’-Bashkimi Europian tha të premten se kryeministri i Hungarisë Viktor Orban po vizitonte Moskën pa një kërkesë nga liderët e tjerë të BE-së, në një udhëtim që kërcënon të minojë qëndrimin e bllokut ndaj luftës në Ukrainë.
“Vizita e kryeministrit Viktor Orban në Moskë zhvillohet ekskluzivisht në kuadrin e marrëdhënieve dypalëshe midis Hungarisë dhe Rusisë”, tha në një deklaratë shefi i Punëve të Jashtme të BE-së, Josep Borrell.
“Kryeministri Orban nuk ka marrë ‘leje’ nga Këshilli i BE-së për të vizituar Moskën”.
BE-ja prej 27 vendesh e ka kundërshtuar me vendosmëri luftën e Rusisë kundër Ukrainës, duke vendosur 14 raunde sanksionesh të paprecedentë ndaj Moskës për pushtimin.
“Ky qëndrim përjashton kontaktet zyrtare midis BE-së dhe Presidentit Putin. Kryeministri hungarez nuk po përfaqëson BE-në në asnjë formë,” tha Borrell.
Presidenca gjashtëmujore e Hungarisë e BE-së i jep vendit të Europës Qendrore ndikim mbi axhendën dhe prioritetet e bllokut për gjashtë muajt e ardhshëm.
Ndërkohë Orban, tha të premten se nuk është në pozitë për të udhëhequr bisedime mes Ukrainës dhe Rusisë. Ai i bëri këto komente para se të mbërrinte në Moskë për t’u takuar me presidentin rus, Vladimir Putin.
Ai tha se fakti se Hungaria mban kryesimin e BE-së tani, nuk i jep atij mandat të udhëheqë negociata në emër të bllokut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
