.png)
Gazeta Si – Brigitte Macron është gati të paraqesë dokumentacion fotografik, të dhëna mjekësore dhe dëshmi shkencore në një gjykatë amerikane për të hedhur poshtë një nga akuzat më absurde dhe shpifëse të viteve të fundit: se ajo nuk ka lindur grua.
Teoria, e cila është rilançuar disa herë në internet, u përhap nga influencuesja amerikane e krahut të djathtë, Candace Owens, e njohur tashmë për pikëpamjet e saj ekstremiste.
Pas javësh tensioni në rritje, Zonja e Parë franceze dhe bashkëshorti i saj Emmanuel Macron kanë zgjedhur të reagojnë ligjërisht, duke e çuar çështjen në gjykatat amerikane.
Sipas avokatit të tyre, Tom Clare, çështja përfaqëson një “shpërqendrim të dhimbshëm” për kreun e shtetit francez, por çifti është i vendosur të provojë se akuzat janë të rreme dhe t’i japë fund përfundimisht asaj që ata e quajnë procedura “poshtëruese dhe sureale”.
Akuzat që shkaktuan reagimin ligjor të Macronëve, vijnë nga Candace Owens, një aktiviste dhe influencuese amerikane me lidhje me të djathtën konservatore.
Owens ka deklaruar vazhdimisht, përfshirë publikisht në mediat sociale, se Brigitte Macron është në fakt një burrë biologjik.
Akuzat, të përshkruara si “jashtëzakonisht tronditëse” nga avokati i çiftit presidencial, u përsëritën edhe në podkastin Fame Under Fire të BBC-së, duke u dhënë atyre jehonë ndërkombëtare.
Tom Clare, avokati amerikan i Macron-ëve, shpjegoi se znj. Macron i përjetoi këto aludime si një sulm personal thellësisht ofendues, ndërsa presidenti francez i sheh ato si një shpërqendrim institucional në një moment delikat të presidencës së tij.
Çifti ka vendosur të ndërmarrë veprime vendimtare, duke u mbështetur në sistemin gjyqësor amerikan për të kërkuar drejtësi.
Padia për shpifje u ngrit në korrik 2025 në një gjykatë në Delaware. Macronët akuzojnë Owens-in për zhvillimin e një fushate “poshtërimi global” dhe “ngacmimi mediatik” kundër Zonjës së Parë.
Padia përfshin 22 akuza dhe, ndërsa nuk specifikon shumën e dëmeve të kërkuara, ajo i referohet dëmeve kompensuese dhe ndëshkuese, siç parashikohet nga ligji amerikan.
Meqenëse përfshihen figura publike, ligji amerikan kërkon që për të siguruar një dënim, paditësit duhet të demonstrojnë “keqdashje të vërtetë”, që do të thotë se deklaratat e kontestuara janë bërë me vetëdije ose me neglizhencë të rëndë.
Ky është një standard i lartë ligjor, duke e bërë betejën ligjore edhe më komplekse, por jo të pamundur. Strategjia e mbrojtjes do të jetë e gjerë dhe komplekse. Siç konfirmoi Tom Clare në disa intervista, familja Macron do të paraqesë prova fotografike, dokumente mjekësore dhe dëshmi ekspertësh për të dëshmuar feminitetin biologjik të Brigitte Macron.
Ndër provat e cituara, janë fotografi të gruas së presidentit shtatzënë dhe foto familjare që e tregojnë atë duke rritur fëmijët e saj, elementë që ekipi ligjor i konsideron të pakundërshtueshëm.
Clare shpjegoi se “do të dalin në pah dëshmitë e ekspertëve me natyrë shkencore” dhe se çifti është gati të demonstrojë në detaje dhe konkretisht falsitetin e akuzave.
“Është tepër tronditëse të mendosh se duhet të përballesh me prova të tilla”, deklaroi Clare, “por Brigitte Macron është e vendosur të mbajë mbi vete këtë barrë publike nëse kjo ndihmon në zgjidhjen e kësaj çështjeje”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
