.png)
Gazeta Si – Brenda pak ditësh Shkodra është tronditur sërish nga një atentat me armë zjarri mëngjesin e kësaj të hëne, me një bilanc lufte: 2 të vrarë dhe 2 të plagosur.
Sipas policisë, Rakip Gila, autori i dyshuar masakrës, ka hyrë në një lokal ngjitur me Bashkinë e Shkodrës dhe ka qëlluar me breshëri automatiku duke lënë të vdekur Armando Palin dhe Liridon Krajën.
Ndërkohë, është plagosur biznesmeni Erogen Vaso alias Bajroviç dhe një grua, e cila punonte si kameriere.
Autori tentoi të largohej me një makinë tip “BMW”, pasi më parë kishte përdorur një motor, por pësoi një aksident që tërhoqi vëmendjen e policisë, e cila e arrestoi në përpjekje për t’u larguar drejt lumit Kir.
Dyshimet e deritanishme, janë se shënjestra mund të ketë qenë Erogen Vaso, vëllai i Denis Bajroviç, i cili mbahet i arrestuar si ekzekutori i Gjin Ndojit për llogari të grupit të Bajrajve në vitin 2020. Erogen Vaso rezulton person me precedentë të mëparshëm dhe subjekt i OFL.
Pali dhe Vaso kanë qenë më parë këshilltarë në Këshillin Bashkiak të Shkodrës nën logon e PBDNJ-së. Po ashtu, Pali rezulton edhe ish punonjës i IMT-së në Shkodër.
Erogen Vaso alias Erogen Brajoviç është vëllai i Denis Bajrit, i shumëkërkuari që u ekstradua në korrik nga Dubai me akuzën e vrasjes së Gjin Ndojit në vitin 2020 në Shkodër për llogari të Ervis Martinajt.
Përveç të vëllait, edhe emri i Erogenit ka dalë si i përfshirë në vepra kriminale. Në vitin 2023, u përmend në një dosje të SPAK si pjesë e grupit të Bajrave.
Në atë kohë u lëshuan 14 masa sigurimi për akuzat vrasje me paramendim, grup të strukturuar kriminal, sigurim kushtesh për vrasje, korrupsion, shpërdorim detyre dhe nxjerrje të sekretit hetimor.
Sakaq, autori i vrasjes së dyfishtë, Rakip Gila, u vu në pranga pranë lumit Kir. Ai vetëm pak minuta pasi kreu atentatin ka braktisur në vendngjarje motorin e tij dhe është larguar me një makinë, por është përfshirë në aksident gjatë ndjekjes nga policia.
Ende nuk dihen motivet e ngjarjes, por nuk përjashtohet pista e hakmarrjes duke marrë parasysh se emri i Erogen Brajoviç del si i përfshirë në grupin e Bajrave.
Ngjarja vjen gjithashtu pak ditë pas vrasjes së 34-vjeçarit Kristian Kola, i cili u ekzekutua mbrëmjen e 4 shtatorit në një lokal në lagjen “Vasil Shanto” të Shkodrës.
“Rreth orës 08:50, në lagjen “Qemal Stafa”, në ambientet e jashtme të një lokali, dyshohet se shtetasi R. G. ka qëlluar me armë zjarri dhe si pasojë janë plagosur shtetasi E. V. (B.), 43 vjeç, i cili ndodhet nën kujdesin e mjekëve, si dhe shtetasja M. K., 25 vjeçe, e cila është dëmtuar lehtë. Gjithashtu, si pasojë e të shtënave, ka humbur jetën në vendngjarje shtetasi A. P., ndërsa në Spitalin Rajonal Shkodër ka ndërruar jetë edhe shtetasi L. K. (L.), 31 vjeç. Shërbimet e Policisë kanë shkuar menjëherë në vendngjarje dhe janë vënë në ndjekje të autorit. Pas disa minutash ndjekjeje, bënë të mundur kapjen e tij dhe sekuestruan një armë zjarri automatike”, – njofton policia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
