.png)
Bërësit e politikave të Bankës Qendrore Europiane kanë rënë dakord të kenë si qëllim inflacionin deri në 2% dhe të lejojnë hapësirë për ta tejkaluar atë kur të jetë e nevojshme.
Vendimi shënon një ndryshim të rëndësishëm nga objektivi i mëparshëm i “poshtë, por afër, 2%”, që disa politikëbërës menduan se ishte shumë i paqartë.
Konsensusi doli në një takim të veçantë që u zhvillua në 6-7 korrik për të përmbyllur rishikimin e parë të strategjisë së BQE-së në pothuajse 20 vjet.
Strategjia e rindërtuar mund t’u japë zyrtarëve justifikimin për mbajtjen e politikës monetare ultra të lirshme për më gjatë ndërsa përpiqen të kthejnë vitet e inflacionit nën objektiv, të cilat kanë peshuar potencialin ekonomik të Eurozonës.
Do të jetë gjithashtu thelbësore për drejtimin e veprimeve të bankës qendrore ndërsa ekonomia rimëkëmbet nga pandemia.
Bërësit e politikave pritet të diskutojnë pas verës se si të dalin nga masat emergjente që përfshijnë një program jashtëzakonisht fleksibël të blerjes së bonove 1.85 trilionë euro.
Programi gjithashtu përfshin një gamë të gjerë të çështjeve të tjera të politikave duke përfshirë mënyrën për të ndihmuar luftën kundër ndryshimit të klimës, ndërveprimin e politikave fiskale dhe monetare, tendencat e punësimit dhe globalizimin.
Qëllimi i inflacionit ishte në thelbin e vlerësimit. Lagarde tha muajin e kaluar se ndërsa politikëbërësit e trajtuan atë në mënyrë simetrike – që do të thotë se janë të përkushtuar t’i përgjigjen njëlloj rezultateve shumë të ulta dhe shumë të larta – frazat aktuale mund të kenë bërë angazhimin e tyre “konfuz për vëzhguesit dhe tregjet”.
“Sigurisht që ju do të mendonit se kjo duhet të shtynte edhe më tej ngritjet e mundshme të normave të interesit në të ardhmen, dhe gjithashtu, për mendimin tim, do të kërkonte më shumë blerje të aseteve”, tha Jacob Kirkegaard, një anëtar i vjetër i Fondit Gjerman Marshall.
“Por sigurisht, realiteti është se edhe një objektiv i tillë i jep BQE-së potencialisht shumë diskrecion.”
Qasja e BQE-së do të jetë e ndryshme nga politika e shënjestrimit të inflacionit mesatar që Rezerva Federale njoftoi vitin e kaluar pas rishikimit të saj, e cila nënkupton një tejkalim automatik pas periudhave të dobësisë.
Presidenti i Bundesbank Jens Weidmann është ndër zyrtarët skeptikë për një qasje të tillë. Ai ka thënë që mbajtja e politikës së lirë kur inflacioni aktual është mbi objektivin për një periudhë afatmesme mund të krijojë përshtypjen se banka qendrore po i mban me qëllim të ulët kostot e huazimit të qeverisë, duke minuar pavarësinë e saj me atë që njihet si mbizotërim fiskal.
Ndërsa inflacioni tashmë parashikohet të rritet shumë mbi objektivin deri në fund të këtij viti, Lagarde dhe kolegët e saj kanë thënë në mënyrë të përsëritur se ata presin që të bie nën qëllimin e vendosur në një periudhë afatmesme.
Anëtarja e bordit ekzekutiv Isabel Schnabel la të kuptohet të shtunën se BQE mund të lejojë tejkalimin. Në një fjalim në Gjermani, ajo tha që politikëbërësit duhet të lejonin që dinamikat aktuale të inflacionit bazë të shihen në përputhje me parashikimet.
“Një durim i tillë mund të çojë në rezultate të inflacionit që janë mesatarisht mbi qëllimin tonë për një periudhë të përkohshme kohe,” tha ajo. “Kjo do të jetë një kërkesë e domosdoshme dhe proporcionale.”
Burimi: Bloomberg/Përshtati Gazeta SI
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
