Nga Gazeta ‘SI’ – Në fund të gjysmës së parë të vitit 2023, borxhi i jashtëm bruto i Shqipërisë vlerësohet sa 52.4% të PBB-së (10.2 mld euro) me një rënie rreth 8 p.p nga 2022-shi sipas Bankës së Shqipërisë.
Por kjo, thekson BSH, sepse është rritur PBB-ja nominale dhe nuk është zvogëluar borxhi, madje ai është zgjeruar me 3.2% për të njëjtën periudhë. Kjo lidhet me emetimin e Eurobondit, që njihet si borxh i qeverisë. Mbi 50% të këtij borxhi i përket po qeverisë, 16.5% bankave përveç BSH-së, 14.7% janë investime të huaja direkte dhe 2.2 i përkasin Bankës qendrore.
Në ndarjen sipas maturitetit, borxhi afatgjatë përbën rreth 90.8% të totalit, ndërsa borxhi afatshkurtër rreth 9.2%.
Treguesit e aftësisë ripaguese afatgjatë të borxhit të jashtëm kanë vazhduar të përmirësohen edhe gjatë gjysmës së parë të vitit 2023, ndikuar nga rritja e eksporteve dhe të ardhurave fiskale, raporton BSH.
Kështu, raporti ndërmjet borxhit të jashtëm bruto dhe eksportit vjetor të mallrave dhe shërbimeve vlerësohet në 115.1%, nga niveli 136.8% një vit më parë. Gjithashtu, raporti i borxhit të jashtëm ndaj të ardhurave fiskale u pakësua në 183.0% nga 213.9% një vit më parë.
Edhe treguesit e mjaftueshmërisë së likuiditetit shfaqin tendenca përmirësuese. Stoku i rezervës valutore mbulon 333.8% të borxhit të jashtëm afatshkurtër në fund të tremujorit të dytë 2023, duke dëshmuar për mjaftueshmëri në përballimin e detyrimeve afatshkurtra.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
