Qeveria ka miratuar aktin e monitorimit të çmimeve të produktit të shportës nga bordi i transparencës në raport javor.
Akti i miratuar në fund të muajit mars përcakton se bordi do të monitorojë çdo javë çmimet e produkteve, sipas listës së miratuar prej tij dhe do të vendosë marzhin e fitimit.
Kushtet e bordit do të zbatohen nga të gjithë bizneset, në të kundërt gjobat nisin nga 2 mln lekë për tregtarët e vegjël në 10 mln lekë, e më pas mbyllje e biznesit dhe sekuestrim malli.
Konkretisht për subjektet e tregtimit me shumicë të produkteve ushqimore bazë dhe produkteve të lidhura me to dënohen me gjobë, në masën 10 milionë lekë, ndërsa subjektet e tregtimit me pakicë të produkteve ushqimore bazë dhe produkteve të lidhura me to dënohen me gjobë, në masën 2 milionë lekë.
Akti Normativ përcakton ndër të tjera se të gjitha subjektet janë të detyruara të marrin masa për mbajtjen e rezervave deri në 3 muaj ose në përputhje me jetëgjatësinë e produktit, me qëllim garantimin e popullatës me furnizime.
Sipas rastit, Bordi mund të vendosë krijimin e një task-force, me përfaqësues nga Drejtoria e Përgjithshme e Tatimeve, Inspektorati Shtetëror i Mbikëqyrjes së Tregut dhe Autoriteti Kombëtar i Ushqimit.
Bordi çdo javë do të monitorojë vlerën e çmimit të produkteve, sipas listës së miratuar prej tij, dhe vendos marzhin e fitimit.
Vlera e çmimit do të përcaktohet nga çmimi i dërguar nga Drejtoria e Përgjithshme e Doganave, sipas origjinës së produkteve. Nga marzhi i fitimit të përcaktuar nga Bordi, për subjektet e importit dhe prodhimit.
Ndërsa për subjektet e tregtimit me pakicë, nga marzhi i fitimit i përcaktuar nga Bordi, mbiçmimin e përllogaritur, do të aplikohen edhe taksat e tarifat, sipas legjislacionit në fuqi.
Bordi do të përbëhet nga ministri përgjegjës për financat dhe ekonomisë, si kryetar. Ministrin përgjegjës për bujqësinë, Drejtorin e përgjithshëm të Tatimeve, Drejtorin e përgjithshëm të Doganave, Drejtorin e përgjithshëm të Autoritetit Kombëtar të Ushqimit, përfaqësues nga shoqëritë e tregtimit të produkteve;
Bordi mund të ftojë të marrin pjesë në mbledhjet e tij edhe përfaqësues të tjerë nga institucione shtetërore, ekspertë të fushës apo grupe interesi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
